Khuarel chhiatna laka him zawk theihna atan thawhho dan an rel

Disaster Management & Rehabilitation minister Prof. Lalnilawma chuan United Nations Secretary- General (SRSG) for Disaster Risk Reduction (UNDRR) special representative Kamal Kishore chu Thawhtanni khan New Delhi Mizoram House-ah a kawm a. Technical thila thawhhona tha zawk neih theih dan tur an sawidun.
Minister hian khuarel chhiatna hrang hrang – lirnghing, leimin, lung tla, sik leh sa inthlak danglamin a nghawng chhiatna dang laka Mizoramin harsatna a tawh theih dan a sawipui a. Heng chhiatna lo thleng thut thei laka Mizoram mipui an inven theihnan khawpui ruahmanna tha zawk siam leh in sak danah pawh tunlai thiamna hmanga building sak dan tur kaihhruaina tha zawk siam chungchanga Mizoram hmalakna, Aizawl khawpui tawt lutuk chungchang leh Thenzawl Peace City atana ruahmanna siam dan a sawi a ni.
National Disaster Management Authority (NDMA) nen thawkhoa leimin nasa laka himna tur Mizoram sawrkarin project a siam, chhiatna a thlen hmaa rang zawka ralkhel dar (warning system) tih rik dan tur, in sak dan him leh tha zawk leh mipui inralrin dan tur zirtirna pawh sawi a ni a. Heng chhiatna laka mipui himna tura tunlai thiamnaa tanpui an ngaih zia pawh a sawi a ni.
UNDRR special representative chuan Mizoram hmalakna tha a tih thu a sawi a. UNDRR chuan thiamna kawnga tanpui tur leh, ramdang mithiam bikte nena Mizoram state thlunzawm dan turah an inhawng tih a sawi. North-East Regional Disaster Management Conclave Mizoramin a thlen tur chungchang pawh an sawidun a ni.
Khawvel sik leh sa danglam zelah khuarel chhiatna nasa zawk thleng thei do let dan leh inbuatsaih lawk dan, chhiatna nasa zawk a thlen lohna tura Sendai Framework for Disaster Risk Reduction inkaihhruaina zawm leh thlawp chungchang pawh sawi a ni bawk.
DM&R minister hi Mizoram sawrkar adviser Renu Sharma, Delhi Mizoram House resident commissioner Shweta Chauhan, DM&R secretary Sushil Singh leh Delhi Mizoram House additional RC Alexander V Chongthu ten an tawiawm.