Ella Langley “Choosin’ Texas”-in record siamin Hot 100-ah a No.1

On Jul 29, 2026 0 0

Ella Langley “Choosin’ Texas”-in record siamin Hot 100-ah a No.1
Ella Langley hla hit “Choosin’ Texas” chu Billboard Hot 100 (US singles) chart-ah a No.1 a, he chart-ah hian kar 15 a No.1 tling ta a, hmeichhe zaithiam, midang zai pui nei lo a Krismas rimnam hla ni lo Hot 100 chart-a No.1 ni rei thei ber a ni.
He hla hian kumin February khan a vawi khat nan chart No.1 a rawn ni a, kar kalta kha a kar 14 No.1-na niin, Mariah Carey “We Belong Together” (2005) leh Whitney Houston “I Will Always Love You” (1992-93) te rawn nih rualin, Krismas rimnam hla ni lo, hmeichhe zaithiam mahni chauha zai a he chart-a No.1 ni rei ber an ni ho a, tunah hian a zawn lovin kar 15 chhung a No.1 tling ta chiah a, Carey leh Houston te kalsanin, amahin record a siam ta a ni.
Krismas rimnam hla lak telah pawh “Choosin’ Texas” hian phak loh pakhat chiah a nei a, chu chu Mariah Carey Krismas lengzem hla hit “All I Want for Christmas Is You” niin, he hla hi hmeichhe zaithiam mahni a zaiin a sak zinga Hot 100 chart-a No.1 ni rei thei ber niin, kar 22 a No.1 tling tawh a, hmeichhe zaithiam chauh pawh ni lo, mipa pawh telin he hla aia Hot 100 chart-a No.1 ni rei thei a la awm lo.
Hot 100 chart-a No.1 nih reiah kar 19 No.1 ni thei hla pahnih- Saboozey “A Bas Song (Tipsy)” leh Lil Nas X feat Billy Ray Cyrus “Old Town Road” ten Carey hi an dawt a, Morgan Wallen “Last Night” (kar 16), Luis Fonsi & Daddy Yankee feat. Justin Bieber “Despacito” (kar 16), Mariah Carey & Boyz II Men “One Sweet Day” (kar 16), Ella Langley “Choosin’ Texas” leh Harry Styles “As It Was” kar 15 ve ve te pawh No,1 rei zual an ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni. Ella Langley “Choosin’ Texas” hian kar khat chhungin stream maktaduai 25.2, radio airplay ngaithlatu maktaduai 51.9 leh sales 7,000 a la nei thei a, hei hi a kar 15 nan chart-ah a No.1 pui leh ta a ni.
Tunkar chart top four-ah country hla vek langin, chart No.1 hlui Taylor Swift “I Knew It, I Knew You” chu No.2-ah bawk a la awm a, Stella Lefty “Boston” chu No.6 atangin No.3-ah a invawrh a, Ella Langley leh Morgan Wallen “I Can’t Love You Anymore” chu No.4 a rawn kai thar leh ta a ni.
Chart No.1 hlui Arana Grande “Hate That I Made You Love Me” chu No.4 atangin No.5-ah a tawlh a, Tame Impala & JENNIE “Dracula” chu No.5 atangin No.6-ah a tawlh a, Olivia Dean “So Easy (To Fall in Love)” chu No.9 atangin No.7 a kai thar leh ta a, Ella Langley “Be Her” chu No.3 atangin No.8-ah a tawlh a, Olivia Dean hla dang “Man I Need” chu No.8 atangin No.9-ah a tawlh a, chart No.1 hlui Bruno Mars “I Just Might” chu top 10 khartu niin, No.10 a ni.