Chhu kai ta ngei e!

Spain defender pawimawh Marc Cucurella chuan World Cup-ah an champion chuan an head coach Luis de la Fuente hmel chu a tattoo-ah a chhut kai tur thu a sawi a. A sawi lawk ang ngeiin Cucurrela hian a ban dinglamah De la Fuente hmel hi a chhu kai ta ngei e!
Defender taima leh thawkrim Marc Cucurella hi World Cup 2026-ah Spain an champion theih nan a thlawhhlawk hle a, macth 8 an khelh chhungin a khel kim vek a ni satliah lova, vawi khatmah thlak a ni lo hial. Spain in goal khat chiah an chhuah theih nana tlarhnung ban rinawm leh pawimawh a ni a, mualchhung khawi hmunah pawh awm hman khawpa thawkrim leh daihzai a ni. Khawvelin defender tha a nihzia an hriat chian phah hle nghe nghe a ni.
Real Madrid defender thar Cucurella hian World Cup-ah an champion a nih chuan De la Fuente hmel chu a tattoo-a a chhut kai tur thu a lo sawi lawk ang ngeiin a tihlawhtling a. A ban dinglama a chhutkai hnuin ‘Ka thutiamah ka ding nghet e!’ video leh thlalak chu social media lamah a tarlang.
Final-ah Argentina an hneh hnu khan Luis de la Fuente chuan Cucurella hi ‘Tihsual i nei’ tih hrilha a fiam thu a sawi. A sawi ang ngeia Cucurella-a’n a tih hlawhtlin hnuin De la Fuente hian, “an ti ta chu nia, mah se an hlimpui ve chek ang”, a ti a. “Hmelchhe bumro tak ka ni hran lo bawk a, min tihlim phian a, a thutiama a ding tlat hi a chhuanawm lai chu a ni,” tiin a sawi zui ve bawk.
Defender huaisen, taima leh thawkrim Marc Cucurrella hi Artuibawm tawih tawh lam ang maiin a sam a puk hluai. A sam buk chhur mai hi mi tamtakin an lawm a, tam takin hmuh ninawm an ti thung. A sam chungchangin titi a siam tih a hriat in Cucurella hian a sam a zuah chhan a sawi a, a fapa Mateo vangin a sam a meh ngai dawn loh thu a sawi.
Cucurrella fapa upa ber Mateo hian autism a nei a, mi hriat hran kawngah harsatna lian tak a nei. Cucurella hi a sam a puk hluai mai hian a fa Mateo-a’n awlsam takin a pa a ni tih a lo hre thei a, chuvanga sam zauh reng a lo ni. A sam zuah chhan hriat hnu chuan Cucurella sam hi sam mawi tak a lo ni reng mai.