Tui supply leh chhiatna laka himna atan thawhpuiah corporator sawm

Aizawl Municipal corporator tharte chu Zirtawpni khan PHE leh Disaster Management & Rehabilitation minister Prof.Lalnilawma’n a kawm.
Khawpui chin chu AMC lam chan a ni a, tui dahkhawl leh tui supply danah leh mipui mamawhna hrang hrangah PHE Department-in theihtawp chhuah zel mah se, sum hian kan mamawhna zawng zawngah a daih vek seng loa, hetah hian AMC lam, a bikin corporator-te nen an bialah theuh tanho a ngai hle tih a sawi. PHED atangin theihtawp an chhuah zel dawn a, AMC lam pawhin theihtawpa an tan a tul a, thawhhona tha tak an neih chuan nasa takin hna an thawk thei dawn tih a sawi a ni.
Aizawl hmun hrang hranga khuarel chhiatna thleng thinah inpawh zawka an thawhho zel a tul a. State Sawrkar a inhawng reng a, an theihna zawnah theuh mipui tan theihtawp chhuahpui zel turin a sawm tih minister hian a sawi a. Leivung a hmun loa paih avangte, in sak dan fimkhur tawk loh vangte, lei laih dan kawngah leh bawlhhlawh paih danah tun aia nasaa tan an lak a tul, tiin, thuneitute pawh tun aia nasaa an tan tlan a tul hle a. Fimkhur tawk loh avanga khuarel chhiatna thleng thin pumpelh turin sawrkar thuneitute leh mipui thlenga tangrual a, thawho that a tul hle tih a sawi.
Leivung paih chungchang leivung a paihna hmuna paih a nih loh avangin Aizawl mipuiin tui thianghlim supply mumal tak an hmu lo fo tih a sawi a. Leivung a hmun loa paih avangin Tlawng lui leh lui dang a bawlhhlawh nasa thin hle a, fur lai phei chuan Aizawl khawpui chawmtu a nut nasat thin avangin PHED hian harsatna kan tawk nasa thin hle tih a sawi
“Leivung paih leh bawlhlawh paih lamah khauh taka dan kenkawh a ngai hle a, AMC pawh theihtawp chhuah tura ngenin, mipui tana harsatna thlen loh theih dan ang berin, an tuihna leh environment ti chhe lo thei ang bera hma an lakho a tul tih a sawi bawk.
AMC corporator-te hi Aizawl mayor HLalremtluanga hoin an tel a ni.