Kerala-a ruah sur kaihhnawihah mi 15 thi tawh – CM
Chief Minister V D Satheesan-a chuan tun hnaia Kerala-a ruah sur nasa kaihhnawiha chhiatna thlenga thi chu mi 15 an tling tawh a, chin hriat loh pasarih awm mekin hma lak mek a ni a, chhanchhuah leh chhawmdawl hna chu ruah sur tam tak karah an kalpui zel tih a sawi.
Thawhtannia State Disaster Management Authority thutkhawm hmanhmawh a kaihhruai zawha thuthar lakhawmtute a kawmnaah Satheesan-a chuan sorkarin state pum dinhmun a thlir a, Pathanamthitta tih loh district dang zawngah engkim thunun vek a ni tih a sawi.
Inralrinna chi khat atan Kollam-a sangha manna lawng 14 chu Chengannur-ah chhanchhuah hna thawhna atan dah a ni tih a sawi.
Sulur atangin helicopter pahnihin Thiruvananthapuram an thleng tawh a. National Disaster Response Force team khat tirin hna an thawk mek tih a sawi.
“Helicopter hmang leh a hmuna hnathawkten an sem turin ei tur fun buatsaih a ni a, ruahmanna engkim zawh fel a ni tawh,” a ti.
Chief minister chuan Thawhtanni chawhma thleng khan Kerala pumah relief camp 316 siam niin mi 11,018 an khawsa mek tih a sawi.
District hrang hranga thihna thleng dinhmun sawiin Satheesan-a hian mi 15 thi an awm tawh tih a sawi a. Kottayam-ah mi pathum thiin Erattupetta, Poonjar-ah pahnih leh Puthuppally-a tuizemah naupang a tla hlum tih as awi.
Idukki-ah mi pahnih thi an awm tawh a. Vizhinjam leh Muthalapozhi-ah pakhat ve ve thiin pakhat ve ve bawk chin hriat loh an awm.
Kollam-ah mi pahnih thi tawhin pahnih bawk chin hriat an ni lo va. Malappuram-ah mi pali thi leh chin hriat loh pakhat a awm bawk.
Kannur-ah mi pakhat thi leh chin hriat loh pahnih an awm a, Kozhikode-ah mi pakhat a thi bawk.
Chief minister chuan chin hriat loh pasarihte hi ngawrh taka zawn mek an ni tih a sawi.
Satheesan-a chian an chhut thuak chinah thlai chinna hmun hectare 164.980a zau chhiain lo neitu 3,596-in an tuar tih a sawi a. A zat hi chiang lehzuala hriat hnuah a pun ngei a rinawm tih a sawi bawk.
Chief minister hian mipuite chu social media-ah titi mai mai thehdarh lo turin a chah a, a bikin ‘tuikhuah atangin tui a liam’ tih ang chi, mi tichiai thei tichhuak lo turin a ngen.