Hunthar kawng dal thei an awm lo

LBS Suzuki Avenis, 24th Inter Branch YMA Volleyball Tournament 2026 khelh chhunzawm zel a ni a, August ni 10, Thawhtanni khan mipa quarter-final khelh zawh a ni. YMA Volleyball a hnuhma nei tha ber leh inelna neih mekah champion tura rinkai ber Hunthar Veng dal thei an awm lo tluang zel. Hunthar hian set hloh lova Maubawk hnehin semi-final an lut.
Mipa lamah quarter-final hnuhnung berah YMA Volleyball a hnuhma nei tha; vawi thum ve ve champion tawh Hunthar leh Maubawk te an inhmachhawn. Inkhel ngaihven hlawh takah rin phak bakin Hunthar an chungnung. Volleyball thiam veng Hunthar hian harsatna lian tawk lova set thum la zawnin an elpui lian Maubawk an sawp.
Inkhel ngaihven hlawh takah hian Hunthar in bul an tan tha a, set khatnaah an khingpui ten point 16 bak an hmu thei lo. Set hnihnaah Maubawk khel tha hret mah se point 23 an hmu thei hram a, Hunthar set lak belh tur an dang thei chuang lo. Set hnih an hloh zawn tawh vangin Maubawk an hnual a, set thumnaah an khel tha leh zual. Phur leh inrintawkna sang tak nena inlan Hunthar hian point 12 zeta sang fal chungin set an la leh ta mai a, Maubawk Br. lakah hian point 25-16, 25-23, 25-13 a hnehna changin semi-final an lut. Semi-final-ah Nursery an hmachhawn zui leh ang.
Hunthar laka fiahna hautak hmachhawn tur Nursery hian Volleyball a boruak nei lian tak Kawhai chu quarter-final-ah an hmachhawn a, set hloh lova hnehna changin semi-final an inhlangkai.
Inkhel ngaihven hlawh, inkhel hmuhnawm tak ni tura ngaihah rin phak baka Nursery Br. an khelh that laiin beisei phak baka chhiain Khawhai Br. an inlan ve thung. Set thum an khelh chhungin Khawhai hian point 20 an hmu kai lo vek hial a, an tum a fuh ngang lo a ni ber mai.
Khel tha tak Nursery hian 25-18 in set khatna leh set hnihna an la a. Set thumnaah Khawhai in bul tan tha bawk mah se ruahsur vangin ngai an awh zo lova, point 19 bak an hmuh belh thei lo. Inkhel hmuhnawm takah chak phu Nursery in Khawhai lakah phu takin hnehna an chang a, semi-final an inhlangkai.
Thawhtanni a quarter-final hmasa berah champion lai Muana Veng leh Tachhip ten inkhel hmuhnawm zet mai an lantir. Inkhel hmuhnawm leh inhnehtawk takah Muana Veng an dingchiang a, harsa taka hnehna chang leh hramin semi-final an luit.
Champion lai Muana Veng hian Tachhip lakah set an hloh hmasa. Set an hloh hnuin an insiamtha a, set an la let. Champion lai hneh tum tak Tachhipin set thumna la leh bawk mah se set lina an hloh zui leh a, deciding set khelh a ngai. Set pawimawh tak deciding set-ah Tachhip in bul tan tha bawk mah se hun pawimawhah an chesual a, an khingpuiten an lehpel. Inkhel hmuhnawm takah Muana Veng in champion zia an lantir a, 23-25, 25-23, 20-25, 25-22, 15-13 a hnehna chang hramin semi-final an lut. Muana Veng hian semi-final-ah Khawbel an hmachhawn zui leh dawn.
Muana Veng laka inkhel khirh leh hautak hmachhawn tur Khawbel hian quarter-final-a an khingpui Ngopa chu 26-24, 28-26, 23-25, 25-16 a hnehin semi-final an lut ve bawk.
Vawiin ah hmeichhia leh mipa semi-final khelh a ni dawn. Chawhma dar 10:00 ah hmeichhe semi-final khelh tan a ni ang a; Bungkawn Br leh Dinthar ten an khel hmasa ang a, Luangmual leh Dawrpui Vengthar ten final luh an inchuh zui leh ang. Hmeichhe semi-final khelh zawh a nih hnuah mipa semi-final khelh chhunzawm a ni ang.