CM Special Package phase-I ah bana kaih sak 2255 tan vbch. 18.33 seng

ZPM sawrkar flagship programme kalpuinaah Chief Minister Special Package phase-1 a mi 2255 bana kaihsakna atan cheng vaibelchhe 18.33 sen a ni a, phase-II a mi 3133 bana kaih tawhte tan cheng vbch. 4.25 sen a ni tawh.
Mizoram State Policy Coordination Committee chu an chairman, chief minister Lalduhoma hoin Nilaini khan an thukhawm a. Heta report danin, CM Special Package phase-1 ah progress partner 2255 neiin cheng vaibelchhe 18.33 sen a ni a, phase 2-ah progress partner 3113 thlang tawhin vbch. 4.25 senna tur a ni a, sum hi la pek chhuah vek loh a ni. Dilna la endik fel loh 2135 a awm.
Phase 3 kalpui mai tawh tur a nih avangin la endik loh (pending) hi a ranglama umzui nise an ti a, sum la pek kim loh pawh a rang lama pek nise, an ti.
Loan component bikah hian a vaiin progress partner 742 thlan an ni tawh a, an zingah hian loan hmu tawh 482 an awm a, an loan hmuh zat belhkhawm hi cheng vbch. 44.05 a tling tawh. Mizoram Rural Bank chuan pe hnem berin partner 314 an pe tawh a, an an loan pek zat belhkhawm hi vbch. 23.98 a ni. A pe tam ber dawttu State Bank of India chuan mi 104 a pe a, a pek zat belhkhawm hi vbch. 9.48 niin, a pathumna chu Mizoram Cooperative Apex Bank chuan mi 59 an pe a, an pek zat belhkhawm hi vbch. 10.20 a ni.
An loan punna rulhsakna (interest subvention) hi progress partner 479 tan tum hnih kalpui a ni tawh a. A tum khatnaah Rs. 15,92,137 pek niin, a tum hnihnaah Rs. 96,21,210 pek a ni a. Guarantee fee pawh Rs. 14,01,762 pek chhuah a ni tawh. Loan huangah hian dilna lut tawh la endik fel loh hi 233 a awm mek.
Bana kaih Scheme leh NABARD thawk dun chuan Serchhip district-a khaw pasarihah progress partners 500 huam tur cheng nuai 625.45 project kalpui mek a ni tih sawi a ni a. Bana Kaih phase-3 kalpui leh turah kalphung thenkhat siamrem ngai nia lang sawihoin, phase 3-ah hian inkaihhruaina tihdanglam deuh a awm dawn tih sawi a ni.