Argentina tan Lionel Messi a herliam ta

Football thlengchhuak tawh a, footballer ropui ber ang hiala ngaih Lionel Messi chuan ram tan inkhelh a chawlhsan a, Argentina tana inlan tawh loh tur thu a sawi. Argentina tana her liam ve ta Messi chuan ‘Ka pek theih zawng zawng ka pe tawh a, pek leh chuang tur ka nei tawh lo’ ti chungin ram tan a ballboot a khai ve ta nge nge.
Pathianin thiamna ril a pek Lionel Messi hian kum 18 mi a nih lai kum 2005 khan Argentina senior team tan a khel tan. Hungary an hmachhawn tumin minute 63-naah mual chhung a lut. Mualchhung a luh atanga minute khat hnu lekah full-back Vilmos Vanczak a nghawk vangin hnawhchhuah a ni a, senior team tan bul a tan chhe hle. Chhe takin bul tan bawk mah se a tawp erawh a khar tha viau tho thung.
Argentina senior team tan a khelh tan kum 2005 hian Argentina chu FIFA Under 20 World Cup-ah a champion pui a. Olympic 2008 ah Gold Medal a la zui leh bawk. Kum bithliah inelna lamah chetha viau mah se Argentina senior team ah erawh beisei angin hlawhtlinna a chang thei tlat lo thung. Barcelona-ah a ropui vanglai tawngin, club anga trophy lak theih zawng zawng la kimin, mimal chawimawina sang dawng teuh bawk mah se ram tan hlawhtlinna a chan theih loh vangin sawisel a hlawh nasa hle a. Ram tan inpe tawk lo ang hiala puh a ni.
Argentina tan trophy lian lak ngei tumin tan khawh thin mah se final-ah vanduai zawk an ni leh mai thin. Copa America leh World Cup final-ah vawi thum ngawt an tlawm zawn vangin Messi hian a phur rit tak chu a phur zo ta lo nge nge a. Copa America 2016 final-ah Chile hneh lova an tlawm hnu lawkah ram tan inkhelh a chawlhsan thu a puang zui nghal. Chile an hneh loh tum hian penalty a pet goal lo nghe nghe a ni. Ram tan hlawhtlinna lian chang lova a chawlh vangin Messi hi a ropui tur angin a ropui zo lo.
Argentine Football Association (AFA) buai leh chiri tak chu an insiamtha a, kawng dik an zawh tan. AFA hian an manager thar atan an player hlui Lionel Scaloni an ruai. Scaloni hian Lionel Messi hi an ram tan khel leh turin a thlem a, a ruahmanna tha tak vangin a hmin thei hlauh a, an kokir leh. Scaloni hnuaiah Argentina in champion an thiam thar ta tlat thung a, kum 2021 khan hun rei tak hnuah Copa America-ah an champion leh ta nawlh a, Messi chuan ram tan hlawhtlina a chang ve ta nge nge.
Copa America-ah an champion hnuin European champion Italy nen Finalissima final-ah an inhmachhawn a, 3-0 ngawta hnehna changin trophy an lak belh leh. Messi leh Argentina an kal zel a, football a inelna ropui ber Fifa World Cup 2022-ah ropui takin an champion zui leh a, footballer ropui Lionel Messi chuan club leh ram tan trophy lak theih ang zawng zawng la kimin football a thlengchhuak ta a. Footballer ropui ber a nihzia World Cup trophy hmangin a nemnghet.
World Cup 2022-a an champion hnuin Copa America 2024-ah an champion zui leh a, World Cup 2026-ah final an lut zui leh bawk. World Cup 2026-ah final an luh theih nan Messi hi a thawhhlawk tak zet a, goal 8 ngawt a thun bakah assist vawi li lai a nei bawk. Spain lakah chak zo ta lo mah se Messi hian inelna sang berah pawh ram tak khel tlak, team kairhruaitu tha a nihzia a lantir chiang hle. Argentina tan a la pawimawh em vang hian kum hnih vel chhung tal chu ram tan a la inkhelh zui beiseina lian tak a awm. Argentina kawr haa a inkhel lai hmuh hmuh leh beiseina sang tak awm bawk mah se ram tan inkhel a chawlhsan thu a puang a. Football ngainatuten an beisei aia hmain Lionel Messi hi Argentina tan a her liam a, uitu a ngah hle.
Messi hian Argentina tan vawi 207 khelin goal 125 a thun a, ram tan goal thun hnem ber dawttu niin a chungah Portugal tan goal 146 zet thuntu Cristiano Ronaldo a awm. Tarlan tawh angin Messi hian Argentina hi U20 World Cup, Olympic, Copa America, Finalissima leh World Cup-ahte a champion pui a. World Cup-ah Best player vawi hnih ni tawhin World Cup-a best player vawi hnih ni thei awmchhun a ni. Ram tan bul tan tha lo mah se a chawlh meuh chuan champion theihna zawng zawngah a champion pui ta tho thung.
Kum 37 mi Lionel Messi chuan, “Thutlukna siam harsa tak a ni a, mah se a hun a lo thleng ve tawh tlat si! Kan ram tan hian ka theihna zawng zawng ka hlan kim vek a, hlan loh reng reng ka nei lo. Argentina hian rawlthar tha tak tak kan nei a, chungte chuan hmun chan an phu a ni. He team hi a ngaina em em a, englai pawhin an kiangah ka awm reng ang”, tiin international football a chawlhsan thu a sawi.
Messi a chawlh tak vangin Argentina in chona thar an hmachhawn a ngai dawn a, Messi tel lo Argentina team hi eng ang chiah nge an nih fiah a ni thuai dawn. Ram tan inkhel chawlhsan mah se club tan erawh a la khel zui thung ang.