Real lehpela a ler luah chho Barca

Thawhtanni zanah 5-2-a an mikhual Rayo Vallecano hneh chungin Barcelona chuan Spanish La Liga table-ah hmahruaitu Real Madrid chu point-ah an nihrualpui a, goal difference-a an chungnun zawkna hmangin hma an hruai zui nghal.
Spotify Camp Nou-a mipui 57,768 pungkhawm hmaah Lamine Yamal leh Raphina-te’n mualneitu team tan goal hnih ve ve thawhin team an chakpui a, league season thara game thum an khelh tawhah Bernabeu club ang bawkin Catalan-ho hi an la chak fai vek a ni.
He inkhelah hian Sergio Camello chuan minute 12-na lekah Vallecano hmahruaina goal thunin, hei hian milian muhil a kaitho a ni ta ber a; minute 19 an khelh tlin rualin Brazilian Rapinha chuan Barca siphurh a sut a, minute hnih a kal leh tihah Yamal chuan home team hmahruailetna goal thawh ve lehin, hei bak chawlhlawk hmain goal dang a luhbelh lo thung.
Second half tir lamah Florian Lejeune chuan Newcastle lama a khelhpui thin Anthony Gordon-a cross ball vawrh chhuah chu an lam goal-ah a tilut palh a, he own goal hmang hian Barcelona-in 3-1-in hma an hruai.
Darkar khat an khel tling tep tihah goal hmahruai thuntu Sergio Camello bawkin Rayo Vallecano tan goal khat dang thawh lehin a goal hnihna a hlawhchhuak a, mahse, an comeback tura an beiseina chu goal hnih chhuahin a tawp zui ta tho a ni.
Second half minute 71-a a goal hnihna a tihluh rualin Raphinha chu kum 2017-a record siamtu Lionel Messi hnu lama season tir lam La Liga game hmasa pathum atanga goal nga thun tling leh thei hmasaber a ni.
Spanish rawlthar kum 19 mi Yamal pawhin last minute-ah Barca goal ngana thawh ve lehin, ti hian, a club vawn lai tan goal 51 a khawl tling ta hial a ni.
Tun dinhmunah hmahruaitu pahnih Barcelona leh Real Madrid chu a tir khelh thum atanga point kaw hmu tawh awmchhun la niin, Vallecano hian point khat chiah an la hlawhchhuak thung.