Taxi app-a inziahluh hun pawhsei rel

Mizotaxi app-a inziahluh hun chu pawhsei leh rel a ni.
Chief secretary Khilli Ram Meena kaihhruaiin Coordination Committee on Traffic Management an thutkhawm a. Mizotaxi app hman theiha tlangzarh a nih hnua two wheeler taxi leh four wheeler taxi inziahluh dan leh hmangtu awm dan thlirletin, inziahluh hun pawhsei rawtna sawiho a ni.
Transport secretary C Lalruaia report danin, September 11 thleng khan Mizotaxi app-a inziaklut taxi 1570 an awm a. Heng zinga 397 chu four wheeler taxi, 1149 chu two wheeler taxi, 24 chu autorickshaw an ni. Mizotaxi app kaltlanga taxi hman tum chhinchhiah zat chu 28553 a ni a. Thutkhawm ni hian taxi driver online 279 an awm.
Mizotaxi app chu State Transport Authority-in taxi rate a bithliah dik tak hman a nih theihnan, taxi hmangtu passenger-te him zawkna atana hmanraw tangkai a nih theih thu leh Aizawl khawpui chhunga taxi parking area tawt lutuk tih ziaawmna atana hmanrua a nih theih dan sawi a ni a. Inziahluh hun pawhsei hmasak chhung khan taxi inziaklut thar an thahnem a, mipui pawhin apps hi an hmelhriat tanin an hmang thiam chho tan mek tih sawi a ni. Hei vang hian apps-a in-register duh tan thla thum chhung hun hawn belh rawt a ni.