Barca nihrualin Real an chak

Barca nihrualin Real an chak
Inrinni zan Santiago Bernabeu inkhelah 4-1-a an mikhual Rayo Vallecano sawp chungin match khata khel tam zawk chungin Real Madrid chuan Spanish La Liga table-a hmahruaitu Barcelona chu point-ah an zat chiah a, nizan result tarlan hman lohah Levante muala an result puakchhuah azirin Catalan team hian anmahni umtute an kalsan hla leh thei ang.
He inkhela mualneitu team tana goal hnih thawhtu Kylian Mbappe khan La Liga bika home game 36 a khelh tawh atangin goal 34 a thun tling der tawh a, Bernabeu-a phut zuk nei lo langsar pawl a ni!
Madrid derby-a goal hmahruai hi miunute 14-na leka Alvaro Carreras hlawhhchuah penalty hmanga France captain Mbappe chhuihluh niin, Rayo goalkeeper Emil Audero tluk lohna lamah net puar pawin a thlawh lut!
Minute thum a liam leh tihah left-back Carreras hian Mbappe siamsak atangin home team goal hnihna a thawh ve leh.
Minute 35-ah England international Jude Bellingham a rawn inlar ve ta thung a, Vinicius Junior ball pek atangin Real goal thumna a thawh.
First half tawp dawnah Mbappe bawkin chance hmu leh mah se tuntum chu woodwork (goalposts & crossbar)-in a lo dang hlauh a, La Liga season thara a goal rukna tur a sukuk phah phawt.
Second half tir lamah Sergio Camello chuan Rayo Vallecano goal neihchhun ni zui ta tilut ve bawk mah se hun pekbelhah Mbappe chuan a goal hnihna leh an goal phai chhungkhatin, Vallecano an mikhual hnuhnung vawi 15-ah tum 14 zet Real an chak tling ta a ni!
Inrinni zan inkhel dangah a tir lama Roberto Fernandez-a goal hnih tihluh hmangin Espanyol chuan si hnih faiin Osasuna an hneh ve bawk a; si phur hmasa chungin season bul tan fuh Alaves lakah Racing Santander pawhin 2-1 hnehna an sualchhuak ve bawk.
Facundo Buonanotte second-half penalty hmangin Elche chuan San Mames-ah hma hruai zet mah se Athletic Club captain Inaki Williams chuan hun tawp hma minute 11 la awmah an si phurh a sut a, team pahnih hi chak zawk awm loin an inhnehtawk.