Kuthnathawktute thlantui a lo thlawnin a far tawh lo – PC Vanlalruata

Kuthnathawktute thlantui
a lo thlawnin a far tawh lo
– PC Vanlalruata
ZPM sawrkarin policy a duante a taka tihhlawtlin a nih mek avangin Mizorama kuthnathawktute thlan tui a lo thlawnin a far tawh lo tih Agriculture & Farmers’ Welfare minister PC Vanlalruata chuan a sawi.
Aizawl DC office-in Chief Minister’s Special Package phase-II dawngtu ‘progress partner’ 683, Aizawl district ami a thlanchhuah hnenah Thawhlehni khan an hriat tur tul zirtirin tanpuina a semchhuak nghal a. Hmanpuitu Agriculture & Farmers’ Welfare minister hian, sawrkarin kuthnathawktute tana policy a duan a taka tihhlawhtlin a ni mek tia sawiin, politician-te chuan ram kaihhruai an tum dan policy duangin mipui hnenah an zuar thin a. Tuna kan chief minister-in kuthnathawktuten an thawhrim rah an seng ve theihnan leh hmasawnna rahbi an tuk ve theihnan Mizoram dung leh vanga kum tam policy a lo aupui tawh chu tihhlawhtlinin a awm mek tih a sawi.
“Thlai thar market kan inzawnpui bakah support price hmanga kan inum zel avangin kuthnathawktute thlan tui a lo thlawnin a far tawh lo,” a ti.
‘Progress partner’ thlan hi uluk taka kalpui a ni tih minister hian sawiin, “Party base-a thlan a ni loa, eng party mi pawh ni se, sawrkarin Mizoram hmasawnna tura thawhpui tlak leh Bana Kaih tlaka a ngaihte chu a thlangtu Committee-in an thlangchhuak mai a ni,” a ti.
Sawrkarin an chunga rinna a nghah ngam angin, rintlaka awm tur leh an tanpuina dawn pawh a hmanna tur dik taka hmang a, taima leh rinawm taka dinchhuah pui tum turin a chah a. Monitoring team-in an hmalakna an endik hunah sum rulh ngai dinhmunah an din lohnan an thutiam tawhah nghet taka ding tlat turin a chah tih a sawi bawk.
Phase-II dawngtute tana orientation training neih leh tanpuina sem rual hian, phase-III tana progress partner hnenah sertificate sem nghal a ni a. Orientation training leh tanpuina sem hi district dang thenkhatah pawh neih a ni.