MP-in Aizawl Press Club a tlawh

On Sep 16, 2026 0 0

MP-in Aizawl Press Club a tlawh
Mizoram Journalists’ Association sawm angin Lok Sabha MP Richard Vanlalhmangaiha chuan Thawhlehni khan Aizawl Press Club a tlawh a. MJA hruaitute nen an inkawm.
MP hian, amah chu ZPM party mi ni mah se, Mizoram mipui MP a ni a. Thil thlen dan leh a hmun leh a hun azirin a changin Kristian MP, minority MP, Northeast MP nih chang an nei tel lo thei lo a. Lok Sabha bikah MP zingah Kristian 22 an awm a. Ram chhung hmun hrang hranga Kristian-ten harsatna an tawh changin a theih ang angin hma an la ho thin tih a sawi.
FCRA chungchanga Joint Parliamentary Committee Dinah pawh hmarchhak MP 31 awm zingah pakhatmah member-a telh an ni lo chu tunhnaiah Parliament Secretariat hotute hnenah mak a tih thu a thlen a, a ruattu speaker hnenah pawh lo hrilh turin a chah a. Parliamentary Affairs minister Kiren Rijiju hnenah pawh a la thlen dawn tih a sawi a ni.
MP-te chu state aiawh an nih angin sawrkar laipui an dawrnaah hmelhriat leh thiantha neih a pawimawh a. Kumtin MP Fund an dawn bakah inthianthatna hmanga fund pawhchhuah tur tam tak a awm a, hemi kawngah hian theihtawp chhuah a tum a, Mizoram state chanpual bakah sawrkar laipui atanga sum tam thei ang ber pawt chhuak tura hma lak a tum tih Richard Vanlalhmangaiha hian a sawi a ni.
MP a nih hnuah a hmalakna zarah Mizoram sawrkarin sawrkar laipuia project a thehluh, tihhlawhtlin mai loh (pending) cheng vaibelchhe 668.52 hu pek an nih tawh bakah PMGSY-I hnuaiah GST liability vbch. 150 vel pek chhuah a ni a. Hei phei hi chu project tihtawp tawh, a hmalakna avanga hawn thar leh a ni tih sawiin, National Highway 306 A, Vairengte – Vaitin inkar kawng siamna tur vbch. 99.78 pawh tunhnaiah pek an ni tih a sawi bawk.
A fund hman kawngah dik leh daihzai thei ang bera kal a tum a. Tunah hian Mizorama khaw 94-a zirna in hrang hrangah MP Fund a pe tawh a. Hemi hmang hian building thawmthat ngai, sak thar ngai, hmanraw mamawh lei leh thildang atan hman a ni tih a sawi. Mipui a tam thei ang berin MP fund an chhawr theihnan hma lak zel a tum tih sawiin, ram rawng an bawlnaah mipui thlawpna a ngen rualin, ram leh hnam tan theihtawp chhuah zel a tum tih a sawi a ni.
Pathian leh mipui zarah kum hnih leh a chenve zel MP a ni ve tawh a, ram rawng an bawlnaah thil thar tam tak zir tur a nei a, theihtawp a chhuah ve zel tih a sawi. Parliament Secretariat-ah Mizo officer fel tak a awm a, a hriat loh thil tam tak zirin a hrilhhre zel a, vannei a intih thu a sawi. Parliamentary Standing Committee on Defence-ah kum hnih chhung member a ni ve tawh a. Tunah Parliamentary Standing Committee on Finance member atan ruat thar a ni leh a, finance lamah thiamna bik a nei lo chungin, hetiang dinhmuna ruat a ni chu lawmawm a ti a. Mizote tana thahnemngai tak Ministry of Finance hotu zingah Manipur lam Zohnahthlak a lo awm lehzel a, puitu tur tha tak a nei dawn tih a sawi a ni.