Zirlaite an school-ah an kawng zawh tur ruahmanpui

Zirlaite hma hun sawihona programme, ‘School Connect 2026’ kalpui mek chu Nilaini khan Chaltlang Higher Secondary School Aizawlah neih a ni.
Hmanpuitu Mizoram Youth Commission chairman Malsawmzuala Ralte chuan, sawrkar hnaa inziaktling tur chuan T-5 tumruhna, taimakna, thawhrimna, teirei peih leh time table mumal tak siam a, zawm tlat a ngai a. T-5 nei lo tan competition sang lutuk tawhah sawrkar hnaa inziahtlin a harsa hle a. Vanneihthil thu in a tlin theih loh tih a sawi.
“Kan rilru puthmang kan tih zau a, private hnuaia thawk, corporate-a thawk, mahnia sumdawng adt. Mahnia inchawm ve thei pangngai hi sawrkar hnathawk kan en dan ang chiaha kan en a tul hle. Corporate leh company hnuaia thawkte kan enhniam tur a ni loang,” a ti.
He programme hi MYC, Zalen News leh Lynchpinn tangho huaihawt a ni a. September 14 atanga tanin, September 18 thleng a awh dawn. Kumin hian phai atangin university 10 lokalin, higher secondary school 10 chu an school-ah tlawh kualin zirlate chu a mal malin career counseling neihpui an ni.
Sharda University, Hindustan University, Aditya Group of Institutions, Parul University, Ganpat University, Graphic Era University, Dev Bhoomi Uttarakhand University, SRM University, Harsha Group of Institutions leh Global Reach chu state pawn atangin an tel a. Tualchhung atangin St. Joseph HSS, St. Anthony HSS, Govt. Republic HSS, Home Mission HSS, Govt. Chaltlang HSS, Greenland HSS, Ephraim HSS, Providence HSS, Boston HSS leh Living Water HSS an tel bawk.
Kum 2019 atangin School Connect hi neih tan niin, Covid len laia a khaihlak zawk tih loh kumtin neih zel a ni.