Brighton in United an petchhuak

Nilai zan khan English Carabao Cup third round khelh chhunzawm a ni a, team lian Manchester United chu an mikhual Brighton & Hove Albion lakah si hniha hma an hruai zet hnuin an tlawm. Season thar bul tan tha lo United hian an lu chunga meiling an chhekkhawm chu an mahni ngeiin an chhem alh.
English Premier League (EPL) 2026-27 ah khelh li atanga point li chauh la hmu Manchester United hian Old Trafford ah EPL club Brighton an mikhual. An mualah bul an tan tha viau a, minute 10 chhung lekin bul an tan. |ha chungchuang takin bul tan bawk mah se an tlo zo lova, an tualzawlah ngei tlawmin an mualpho zui leh ta zawk.
EPL ah bul an tan that loh vanga insiamthat mamawh United hian chak ngei tumin Brighton an hmachhawn a, goal pawh an thun hma hle. Inkhel tan atanga minute 8-na lekah Shea Lacey chuan Youri Tielemans siamsak atangin hmahruaina goal a thun nghal.
Hma takah goal an thun vangin an phur viau a, inrintawkna sang tak nen an inlan chhunzawm. Na taka an khingpuite nawr chhunzawmin Mason Mount chuan hmahruaina goal an thun atanga minute hnihna lekah an goal hnihna a thun zui leh zat a, minute 10 an khelh tlin meuh chuan si hnihin hma an hruai der tawh. Bul an tan that em vangin United hi nuamsa taka hnehna chang tura ngaih an ni. Mahse…mahse,,,,,!
Team lian Manchester United lakah si hnih ngawtin hnufual bawk mahse Brighton an hnual mai lova, an zam hek lo. An si phurh sut ngei tumin tan an khawh char char a, chawlhlawk dawn hnaihah an hlawhtling ta nge nge. Brigthon tan hian Charalambos Kostoulas chuan hla tak atanga Hadjam ball pek fuh taka a dawn hnuin si nghak Jason Steele kapkarah fuh takin a thawlh luta goal thunin minute 45+1-ah an si phurh a sut.
Chawlhlawk hnu lamah Brighton an khel tha chhunzawm a, goal hnih an thun belh zui leh. United in nawr tlang an tum laiin defender Vuškovic chuan fuh zeta dang chatin tha takin ball a tauh. Vuškovic ball tauh tha tak hi vengtu nei lova awm Pascal Gross chuan a khalh kual hnuin mawi takin a pet goal a, minute 65-naah an si phurh a sut zo.
An si phurh an sut zawh vangin Brighton an phur thar a, Old Trafford boruak a inthlak hlawk. Mikhual team an phur em em laiin mualneitu team an hnual a, an zam tel bawk. Phurna namen lo tak nena inlan Brighton hian fuh takin an khingpuite an nawr tlang zui leh nghal zat. Vuškovic cross tha tak chu Maxim De Cuyper chuan minute 69-naah fing takin a pet goal a, hma an hruai letna goal a thun.
An mualah ngei hnufual zawk an nih hnuin United in goal thun ngei tumin tan an khawh thar a, hun tlemte la awmah an captain Bruno Fernandes an lehtir. Tlawm pumpelh tumin tan khawh zui nasa viau mah se goal an thun thei tawh lova, an mualah ngei tlawmin an mualpho zui ta tho a ni.
Kum 1976 khan Old Trafford-ah United leh Tottenham te an inkhel a, United in 2-0 a hma an hruai hnuin Tottenham in 3-2 in hnehna an chang let. United in Old Trafford-ah ngei chawlhlawk hmaa goal hnih thun a, 2-0 a hma an hruai hnua an tlawm hmasak ber tum a ni a. Kum 1976 hnu lamah Brighton in an lehthal hi Old Trafford ngei si hniha hma an hruai hnua an tlawm lehna hmasa ber niin hun duhawm lo tak an tawng mek.
Tarlan tawh angin Manchester United hi season tharah an khel tha lo viau a, vawi li khel tawhin vawi khat chiah an la chak a, draw vawi khat neiin tlawm zawkah vawi hnih an tang der tawh. Khelh li atanga point li chauh hmuin 13-na an luah mek. EPL-ah an khelh chhiat em vangin sawisel an hlawh hle a. Sawiselna leh duhkhawpna thlipuiin a nuai lai mekin Carabao Cup-ah Brighton ngam lovin an tlawm zui leh ta bawk si a, manager Michael Carrick leh a player ten an lu chung an meiling chhek chu an mahni ngeiin a chhem alh ta hluah a ni ber mai.
Manchester United hnehtu Brighton hian fourth round lamah khingpui hautak an neih a ngai dawn a, Manchester City leh Norwich City te inkhela chak zawk zawk an hmachhawn zui leh dawn. Anni pahnih inkhelah hian an muala inlan tur an nih vangin Manchester City in hnehna an chan ngei a rinawm. United an hneh tawh a, City an hnawtchhuak leh thei a nih chuan Brighton tan chanchin duhawm tak a ni ngei dawn a ni.
Third round khelh zawh a nih rualin fourth round a inhmachhawn tur pawh fel nghal a ni a, champion tura rinkai zinga mi Arsenal in khingpui hautak pumpelhin league two club Fleetwood an hmachhawn dawn. Arsenal laka fiahna hautak hmachhawn zui leh tur Flletwood hian nilaini khan 1-0 in Sheffield United an hneh a, tui let hnu lama a vawi khat nan Carabao Cup routh round an lut.
Nilai zana inkhel dangah Everton chuan an mikhual Wolverhampton Wanderers chu 1-0 in an hneh a, fourth round an lut ve bawk. Everton hian fourth round ah EPL club Newcastle United an hmachhawn zui leh dawn. Everton in an mualah hnehna an chan laiin Aston Villa in Mimualah hnehna an chang ve bawk.