UN General Assembly-ah Middle East leh Ukraine langsar dawn

UN General Assembly-ah Middle East leh Ukraine langsar dawn
Khawvel ram hruaitu lawkte chu tun kar hian New York-ah UN General Assembly hmangin an pung khawm dawn a, kuminah hian Middle East leh Ukraine ​buaina huang zau zel leh artificial intelligence (AI) hlauhawm theih dan te chu an sawi langsar tur nia ngaih a ni.
Ram 130 dawn hruaitute hi Indopui II-na hnua khawvela buaina a nasat ber hun laia inhmu khawm tur a ni a, buaina kara UN-in zah a kai tawk ta lo em ni tih zawhna a awm mek lai a ni bawk.
Chinese hruaitu, Xi Jinping-a chuan President Donald Trump-a nen Washington-a an inkawm nghal tur chu a thulh nia sawi a ni a. Xi-a hi UN intawh khawma a tel hnuhnung ber chu kum 2021 kha niin hemi tum pawh hian video conference hmangin thu a sawi.
Kuminah hian Secretary-General Antonio Guterres-a chuan a hun a hmang zo dawn a, thlak tura rinkai fal bik an la awm lo.
UN Security Council member ram 15-te chuan Ukraine, AI leh Middle East an sawiho dawn niin Arab hruaitu leh an palaite chuan an sawi.
Assembly-ah hian Middle East chu an sawi lansarh ber tur ni leh tura ngaih sa a ni a, US-Israeli tang dunin Iran an beihna hian khawvel pumah thil man tisangin an chhehvel boruak pawh a titang zual hle a. Tun hnaiah Houthi-ten ⁠Bab el-Mandeb Strait kaltlang phal loh an tumna a awm thar leh bawk a, hei hian thil man a nghawng zual leh tura ngaih a ni.
“Buaina hi sipai chakna hmanga chin fel a harsa a, Yemen-a buaina kal zel dan hian inrawlhin awmzia a neih theih dan pawh a tilang a ni,” tiin Guterres-a chuan a sawi a, Yemen-a UN palai chu inbiakna atana tha thawh hlawk a nih thu a sawi bawk.
Muanna atana inbiakna a awm rih lo va, Iran leh US chu an inkap zui reng bawk a, Trump-a pawhin nasa zawka beihah a vau reng bawk.
Assembly-ah hian Iranian President Masoud Pezeshkian-a chuan Nilaini hian assembly-ah thu a sawi dawn a. International Criminal Court-in Gaza-a indo a kalpui dan avanga man a duh, Israeli Prime Minister Benjamin Netanyahu-a’n Ninganiah a sawi bawk ang.
Palestinian President ​Mahmoud Abbas-a erawh a kum hnih nan a inlan dawn lo va. Israeli thian tha, US chuan visa a pe duh lo va. Ningani khan General Assembly chuan Abbas-a hi video kaltlanga a inlan an phalsak thung.
UN intawh khawmah hian Sudan buaina pawh sawi a nih a rinawm bawk.
Assembly-a sawiho tur langsar zingah kum li indo tawh, Russia leh Ukraine buaina pawh a tel ngei a rinawm.
Ukrainian ​President Volodymyr Zelenskiy-a leh Russian Foreign Minister Sergei Lavrov-a ten General Assembly-ah hian thu an sawi dawn a. Zelenskiy-a hian thlasik lo thleng tura an dinhmun ni thei turte a sawi lan rin a ni.
Security Council-ah Russia chu permanent member a nih avangin veto hmanga hma a lak zel avangin indo hi an titawp thei lo.
Trump-a pawhin nikum January-a a term hnih nana thlan tlin a nih hmain tihtawp tiamin au nasa hle mah se a la titawp thei lo va. US president hian Russian President Vladimir Putin-a chu thla tir khan a bia a, Zelenskiy-a nen New York-ah hian an inhmu dawn em a la chiang lo.