US Secy of State Rubio-a’n kar tharah India tlawh dawn
US Secretary of State Marco Rubio-a chuan karleh hian India a tlawh dawn a, sumdawng aiawh tam takin zuiin Indian thuneitute nen sumdawnna atana pawimawh thil bakah an chhehveleh leh khawvel puma thil thleng hrang hrangte an sawi ang.
Tun hi kumina Rubio-a’n India a tlawh vawi hnihna tur niin May thla khan Prime Minister Narendra Modi leh External Affairs Minister S Jaishankar a lo kawm tawh a. India-US inkungkaihna a chhiat mek laiin Quad foreign ministers’ meeting-ah a tel bawk.
Rubio hian Uzbekistan a tlawh hmasak hnuah India hi a thleng dawn a, Nilaini khan US state department chuan Mumbai leh Jamnagar a tlawh dawn niin an puang a. India a tlawh ni tur tak hi an sawi lang lo va, hetih rual hian Pathianniah Mumbai a lut dawn nia sawi a ni.
Indian thuneitu sangte hmuin ‘US-India inkungkaihna tihngheh dan tur, an chhehvel leh khawvel huapa thil thleng an ngaihdan leh energy-a thawhhona tihpun zel dan tur’ a sawipui dawn niin US state department chuan a puang a. Rubio-a hian sumdawng hruaitute pawh investment leh eibara thawhhona tha zawk a awm theih nan a kawm bawk ang.
Rubio-a hi sumdawng aiawh 200 chuangin an zui dawn a. Sumdawnna thila intawh khawmna lian pawh Mumbai-ah hian buatsaih tur niin Jaishankar-a nen pawh an inkawm dawn nia sawi a ni.
US-India inkar hi tun hnaiah Trump-a sorkarin Sanctioning Russia & Iran Act (SRIA) hmanga Russian tuialhthei lei tam ramte lakah chhiah 100%-a sang lak theihna dan an siam avang leh thil dang dang avangin a chhe angreng hle a. President Donald Trump-a’n kum 2025-a India-Pakistan inkahhai a siam nia a sawite pawh Delhi-in a pawmpui lo va, US sipaiten Oman-a sumdawng lawng an beiha Indian pathum an thih avang tein India hi a lawm lo.
Indian thuneitute chuan SRIA hian ram pahnih inkungkaihna leh khawvel puma energy sumdawnna a tibuai mai thei tih an lo sawi tawh a. Russia hi India-in energy a leina ber a la ni reng a ni a, tun hnai lehzuala Indian leh US thuneitute chuan rei tak buaipui tawh sumdawnnaa inremna tura indawrna a tawp leh rih tawh tih an puang bawk.