Israeli sipaiten Palestinian naupang 2,000 chuang man

October, 2023 atangin Israeli sipaiten Palestinian naupang 2,000 chuang an man tawh niin Palestinian Prisoner’s Society-in a sawi.
Palestinian rights group-in Nilainia report an tihchhuahah hian Israeli thuneitute hian Palestinian naupangte bitum an la thulh lo tih an tar lang a. Palestinian naupang 350 velin tunah hian Israeli lung inah ‘dinhmun hrehawm tak’ an tuar mek niin an sawi.
Thawhlehni pawh khan Israeli sipaite hian West Bank-a an ram luah chin Hebron-ah Palestinian naupang paruk vel an man leh niin an tar lang tel.
Gaza-a naupang an man zawng zawng zat dik tak hi hriat theih a ni lo va, Gaza Strip beih a nih lai khan naupang telin mi tam tak chin hriat lohvin an awm a, an zat dik hriat a har niin an sawi.
Israel-in puhna mumal nei lo leh chhuah hun tur engmah tichiang lova mi an hreng chu ‘naupangten an chhungte hriat loh leh an zirna nghawng theia hremna an tawh a nih avangin dan bawhchhiatna a ni’ tih an awi.
Report-ah hian Israeli-te hian ‘mi tihthaih leh man’ atanga bul tanin ‘sawisak, ei tur pek loh leh an hriselna enkawl that loh’ an kalpui zui thin niin an tar lang.
Palestinian Prisoner’s Society-in report an siamah hian Palestinian naupang hrang hrangte mi mal nun, man an nih hnua an hun tawn, an taksa kim lova an chhuah dan leh thenkhat chu an thihna hial an tawh zui dante pawh tar lan a ni.
Palestinian Prisoner’s Society hian naupangte man an nih te, chhui chiana sawisak, tama an dah leh tha lo taka enkawl an nih dan thlengte hi ‘ram dangte an inrawlh tak tak’ a tul tih an sawi bawk.
Israeli sipaite hian October, 2023-a Gaza an beih atang khan West Bank-ah Palestinian 25,000 chuang manin Gaza-ah hei aia tam fe an man bawk a ni.