Mi sualten Nigeria khua an luhchilhah mi 10 that
Mi sual tute nge an nih hriat lohten Nigeria hmarchhak, Taraba state-a thingtlang khaw kilkhawr tak an suamah mi 10 an thi a, dawr an rawk a, inte an hal bawk tih police-ten an sawi.
Thi zat hi an pun hlauhna a awm a, thil thleng hmutute chuan mi 20 vel thi angin an sawi a, tlawmngai pawl pakhat pawhin mi 50 vel niin an sawi bawk.
Silai kengte hian Zirtawpnia Muslim chhun tawngtai zawh hnu lawkah Karim Lamido-a Ninnari khua hi an luhchilh a, darkar li vel an awmchilh.
Police chuan thi leh hliam dang an awm em tih zawngin khaw daia ramhnuaite an dap zui a, hetih lai hian Amnesty International chuan sorkar chu thingtlang mite venghim zo lovah a puh.
Nigeria-ah hmarthlang, hmarchhak leh ram lailia silai keng pawlte chetna a la nasa em em reng a. Hmarchhakah hian kum 20 dawn jihadist-te an che na em em reng bawk a, mi tam takin himna lama sorkar hmalakna an sawisel nasat phah.
Kohna an dawn hnua an thlen hian police chuang silaia kah hlum ruang 10 an hmu tih an sawi a. An thlen hian a beitute hi an lo tlanchhe hman niin an sawi bawk.
“Kan nangching hman lo va, umzui turin ram thleng chhe tak a nih bawk avangin a harsa a, an lama thi leh hliam an awm lo niin kan hriat,” tiin Assistant Superintendent of Police Victor Mshelizah-a chuan a sawi.
Officer-ten khaw dai an dap zui a, thi hi an la pung thei niin a sawi bawk.
Khawtlang hruaitu, Malam Abubakar Saifullahi-a chuan a beitute hi motorcycle 50 chuangin hlawm hnihin an khua hi an thleng niin news agency AFP a hrilh a. “Dawr rawkin pawisa, ei tur leh a remchang apiang an la a ni,” a ti.
Dam chhuakte chuan thi hi 20 vel niin AFP an hrilh a. “Himna zawngin hmun hrang hrang panin kan tlanchhia a ni,” tiin mi cheng pakhat, Isiyaku Musa chuan a sawi a, “Khawi lai nge him ang tih pawh kan hre lo,” a ti.
Mi dang, Sa’idu Nuhu pawhin mi thenkhat chu an chin hriat lohvin an la awm tih a sawi ve bawk.
Amnesty Nigeria director, Isa Sanusi-a chuan Inrinni khan a tuartu chhungkaw thenkhat an bia a, mi 50 vel an thi niin a sawi a. “Mi 37 vui ngei chu a ngai dawn,” a ti.
Sanusi-a chuan inthahna thleng chu chiang taka chhui chhuah a phut a, thuneitute chu thingtlang hmunte an venghim tha tawk zo lo va, mi tam tak tawrhna a thlen phah tih a sawi bawk.