Lungawi lo chu Court-ah kal mai se: Minister Mathlana

Lungawi lo chu Court-ah kal mai se: Minister Mathlana
Education Minister Dr. Vanlalthlana chuan tun hnaia a department chana hna laknaa beihna a tawh chungchangah, “Chhungkhat leh hmelhriat induhsak bikna awm lovin merit hmanga lak an ni a, a lungawi lo chu court-ah kal mai se, keini chuan kan ngam hle,” a ti.
He thu hi nimina ZPM party chhung inkhawmah minister Dr. Vanlalthlana chuan a sawi a ni.
“Mizoram State University atana thawk tur Group D lakte chu, ram tih fel hun atan chauh ni lovin, MzSU office lailawkah a Tul anga thawk nghal tura lak an ni. Lunglei lamah Pisa tur tih fel huna sawn phei tur an ni a. He hna lakah advertisement chanchinbu awm tawh lovah chhuah ni anga tar lan pawh, IPR P&S Department hian a inchhawkin chanchinbuah advertisement hi an pe mai Thin a, tunhma lama duh duh an pe mai ang kha a ni tawh lo. Chhungkhat leh hmelhriat induhsak bikna awm lovin merit tak tak hmanga lak an ni a, a lungawi lo chu court-ah kal mai se, keini chuan kan ngam hle. Kan sawrkar tirh aTangin hna lakah observer te kan siam zawk a, kan hna lak reng rengah Congress leh MNF hruaitute aTangin an chhungte tlin avanga lawm thu sawina kan dawng fo zawk, ‘In lak dan a dik hle mai,’ an ti Thin. Chu chu ZPM kalphung thar zawk chu a ni. Group D written test neih loh chhan pawh sawrkar dan a nih vang a ni,” tiin minister hian a sawi a ni.
Dr. Mathlana chuan, “Sawrkar hmasa MNF hunah khan advertisement lovin Samagra Shiksha hnuaiah mi 700 dawn lak an ni a, SEDP teacher-ah pawh MNF unit kal tlanga party mi, Minister leh MLA chhungte eng emaw zat lak an ni zawk a. Ha doctor lem thlengin lak an nih kha hre reng ila. Tuna Group D lak dan veitute hian heng thilte thleng hian chhui let ve rawh se. ZPM hi mipuite, a bikin Thalai hna zawngte nat ruala lo na tawh Thin, Thalai hna zawng, thiam loh vang ni lova tling lo Thin kal khawmte pawh kan ni. Chu vangin kan sawrkar chinah chuan kan CM duh danin a tling leh fit chauh lak hi kan thupui ber a ni,” a ti bawk.