Lungleiin State University a ngenna Aizawl leh ram mipuiin an pawmpui: – H&TE minister

Lungleia Mizoram State University dah ngenna chu Aizawl leh ram mipuiin an hrethiamin an pawmpui tih Higher & Technical Education minister Dr Vanlalthlana chuan a sawi.
H&TE minister hian Nilaini khan Lunglei tlawhin Mizoram State University (MzSU) chungchangah official-te leh tlawmngai pawl nen an thukhawm a. MzSU office atana building luah lailawk tur, MzSU office sakna tur hmun, Government J Buana College ram chhunga Women Sports Centre sak mek leh Mizoram Engineering College cheithat hna thawh mek an enho.
MzSU chungchanga Lunglei mipui ngenna chu sawrkarin zahawm a ti a, harsa tak chunga tihhlawhtlin a ni tih sawiin, “Aizawl leh ram mipui pawhin Lunglei lam ngenna an zah a, an hriatthiam bakah an pawmpui niin kan hria a, a lawmawm,” a ti.
NGO leh khawtlang hruaituten zirna an ngaihvenna school leh college-ah zirna a tha in, khawtlangin an tlawh zin leh an ngaihven, hma an lakpui chu school tha ber ber an ni thin tih Dr Vanlalthlana hian a sawi a. Tunhnaiah Mizoram puma school 93 sakthatna tur tender tih chhuah a nih thu leh Lungleiah leh Mizoram pumah zirna tihchangtlunna leh hmasawnna atan ruahmanna leh hmalakna thahnem tak a awm thu a sawi.
“Hnathawhte langtlang taka kalpui tum a ni a, Samagra Shiksha hnuaia hnathawh kal mek pawh online-a en theiha dah a ni. Hmasawnna hna thawh hrang hrang mipuiin kan vil rawn chuan tumahin hna chhia an thawk ngam lo anga, langtlang taka thil tih a nih chuan sawrkar thuneitute leh hnathawktute pawh an tangin hna tha a awm ngei ang,” a ti.
H&TE director Prof. Benjamin Lalrinsanga sawi danin,MzSU chungchangah hmalak dan tur hunbi fel tak siam a ni a. MzSU chu state sawrkarin a senso zawng zawng a tum a ngaih dawn avangin hautak si lo, tha sia kalpui tum a ni. Cluster system-a a awmsa hmang tangkaiin, a hautak lo zawnga hma la turin ruahman a ni a. Campus lianpuia inhung ang chu an phak dawn rih loh avangin, mamawh zual din hmasak a, college hmunhma leh thawktu awmsa rinchhana thuam chak leh tichangtlun tum a ni.
MzSU hmunpui dinna tur ram atan P Lalnuntluanga, Ramzotlang Serkawn te chhungkua chuan Melte Serkawn ram chhunga ram bigha 12-a zau an pe a. Hei hi H&TE minister ho hian a hmunah enho nghal a ni. He ramah hian MzSU hmunpui tur – administrative building, quarters, Multipurpose Hall leh IT Centre, Guest House, Teachers Training Centre leh hmun pawimawh dang sak tur niin, hemi atan hian cheng vaibelchhe 150 vela hma la turin ruahman chhin a ni. A panna kawng hi HPC Lunglei atangin ruahman a ni a. Zirna school chu college hrang hrangah dahin, hmunhma leh thawktute pawh inhman tawm tura ruahman niin, post graduate leh Ph.D thlenga zirna awm tura duan a ni.