Mizoram kaltlanga meth tawlhna bultumtu nia hriat NIA-in an man

Myanmar atanga Mizoram kaltlanga methamphetamine tawlhruknaa a bultumtu nia sawi chu Silchar-ah National Investigation Agency-in an man.
Thudawn danin, 2025 May 4 khan Champhai district-a Dungtlang Police chuan Thinghrangkawn leh Vanzau inkarah Bolero MZ-01 G 7112 atangin methamphetamine kg. 236.33 (mum 20099000) an man a, tum khata Mizoram Police-in ‘meth’ an man tam ber tum niin, he thila inhnamhnawih pahnih – Laltanpuia (30) leh Vanropuia (27) Champhai Vengthar ve ve an man a, unau an ni. Police-in an thil man hlut zawng an chhut hi cheng vaibelchhe 30.72 a ni.
Police-in an chhuizuinaah an ni pahnih nghaktu hi Kolasib district-ah mi pathum dang an man leh a, an ni hi Tripura lam mi pahnih leh Assam lam mi pakhat an ni.
A tirah thubuai ziahluhna Dungtlang Police Station-in la mah se, kumin January National Investigation Agency (NIA) kuta hlan a ni a. Section 17 of the Unlawful Activities (Prevention) Act hnuaiah a tharin thubuai an ziaklut a. Hetianga tih a nih chhan hi, ruihhlo hi firfiaka che thinten sum siamna atan an hmang nia hriat vangin sawrkar laipui chuan a ngai thutak hle tih sawi a ni.
He thil chhuizui zelnaah hian NIA chuan November 15 khan Silchar mi Nurul Islam a bultumtu ber nia hria in an man a. A hnen atang hian mobile phone leh memory card bakah thildang pawimawh tur nia hriat engemawzat an man tel.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More