Mizoram sawrkarin MGNREGA ah state matching share (SMS) a pek theih loh avangin VB-G RAM G hnuaia sawrkar laipuiin sum a la pechhuak mumal loa, inhlawhna sum mipuia pek lohin a awm phah niin BJP chuan an sawi a. Hei hi thudik lo a ni tih Rural Development & Administration department chuan an sawi ve thung.
BJP Mizoram thuchhuak chuan, VB-G RAM G hnuaia inhlawha thawktu tam tak zingah kumin June leh July hlawh la la lo leh September atanga hlawh la lo tam tak an awm tih a sawi a. Hemi chungchanga Union minister of Rural Development Shivraj Singh Chouhan an biakpawhnaah, MGNREGA SMS pe thei lo state pali zingah Mizoram a tel a. Matching share pek a nih loh chuan central atanga sum pek chhuah theih a ni lo tih a lo hrilh nia sawiin, ‘Sawrkarin matching share a ngaihsak miah lo hi miretheite an ngaihsak loh zia a taka tihlannaah kan ngai,’ a ti.
VG-B RAM G hlawh lak hun nghakhlel ngawih ngawihte authawm sawrkarin ngaihthah lo se an duh tih sawiin, VB-G RAM G chu thingtlangmite tan a hlu in, chhungkaw rethei tana innghahna pakhat, hetianga ZPM sawrkarin thla 2/3 chuang hlawh a pe lo chu miretheite hmuhsitnaah an ngai tih a sawi a. Krismas hma ngeia inhlawhna sum hi pe turin an phut tih a sawi a ni.
RD&A department hian thuchhuah siam ve nghalin, state matching share leh state budget pe thei lo, tih chu mipui rilru hruaikawi tumna niin a sawi.
Kumin June 9 khan Union minister for RD Shivraj Singh Chouhan ho hian State RD minister-ten inbiak hmuh theihna hmangin an sawikhawm a. Union minister hian, kumin July 1-ah ram pumah VB-G RAM G hman a nih tawh dawn avangin, Mizoram, Jharkhand, Karnataka leh Telengana chu VB-G RAM G atan state budget peih thuai turin a ti a. Hetianga a sawi lai hian, VB-G RAM G hi hman a la ni loa, MGNREGA hman a la ni a. Hetih hun lai hian Mizoram pawhin July 1 hma ngeia state budget neih tumin Finance department nen hma a la mek tih a sawi.
Kumin June 10 khan Ministry of RD chuan Mizoram tan VB-G RAM G ah interim budget cheng vaibelchhe 611.65 a rawn pe a. Central share vbch. 611.65 pek hnu lawk, June 17-ah Mizoram Finance department chuan 10% SMS vbch. 67.96 chu RD&A department-ah a pe ve nghal a; July 1 hma in Mizoram sawrkar chu state budget allocation vbch. 67.96 nen hian VB-G RAM G atan a inpeih at tawh zawk tih a sawi a ni.
VB-G RAM G hman tur tih hriat veleh nasa takin Mizoram sawrkar a inpuahchah tih sawiin, India rama state VB-G RAM G Scheme notification leh 60-days pause notification chhuah hmasa ber niin, Unemployment Allowance Rules, Delay Compensation Rules, Grievance Redessal Rules, State Council Rules leh VB-G RAM G Fund Rules pawh state dang hmakhalhin a chhuah vek tawh tih a sawi.
‘VB-G RAM G hnuaia mipui inhlawhna sum hi mipui hnena a luh dan tunhma aiin a kual ta deuh a. Fund transfer order (FTO) sign a nih hnu ah state IFMIS-ah bill siam leh phawt niin, chumi hnuah Cyber Treasury-ah bill thehluh a ni a. Hei hi Ministry of RD-a PFMS Division-in a lo pawm leh a ngai a, RBI PFMS in u-Kuber atangin a process ve leh a. State IFMIS-ah lo lut lehin, mipui account-ah a lut thei chauh thin. Hetianga thubelh chian dawllo, mipui rilru hruaikawi thei thil chhuah fo hi department chuan tha a ti lo hle a. Mipui chiai lo tur leh thlaphang lo turin a chah a ni,’ a ti.
Get real time updates directly on you device, subscribe now.
Next Post