Document putru-ah UN chief sawisel nâ

United States of America sorkar chuan UN Secretary General chuan Russia hlawkna/thatna tur a duh lutuk mah mah tiin classified documents online a putru chuan a tarlang.
Washington chuan Antonio Guterres chu a thlithlai reng tiin files te chuan a tarlang bawk a. Document thahnem tak Guterres leh a deputy tena mimala inbiakna an neih te pawh pholanin a awm a.
Hengte hi secret document putru a tel vek niin US officials te chuan engtianga putru nge tih leh tu nge a tiputrutu tih chu zawngin hma an la mek a ni.
Heng document-ah te hian Guterres leh African leader tena Ukraine indonaa an ngaihdan dik tak te tlang hraka sawilanna a lang a ni.
Document putru pakhat chuan Black Sea grain deal thlurbingin hei hi UN leh Turkey tena nikum July thlaa global food crisis thleng mai thei pumpelh nana an hmalakna a ni a.
Guterres chu he inremna tihhlawhtlin tum uchuakah leh Russia thatna tur ngai pawimawh lutukah puh a ni a. “Guterres chuan Russian-in thawnchhuah a neih theih nan hma a la nasa a ni,” tiin document chuan tarlanign, “Russian entities emaw mimal emaw pawh hrekin awm dawn mahse tihhlawhtlin tho a tum,” tiin a tarlang bawk.
UN officials te chuan khawvel top dilomats Guterres chu Russia lakah nem riaua an puhna chu hnawlin document putru kaihhnawihah sawi a nei dawn lo tiin UN senior official pakhat chuan a sawi a. UN chuan khawvel mirethei te indona nghawng avanga an tawrhna nasa tur pumpelh chu a ngaih pawimawh ber a ni, a ti bawk a.
“Food price tihhniam a nih theih nan eng nge kan tih theih tih te, fertiliser mamawh ram tena an mamawh an neih theih nan eng nge kan tih ang tih te chu ngaih pawimawh a ni,” tiin a sawi bawk.
Russia chuan tum tam tak a grain leh fertiliser thawnchhuah te chu international sanction-in a nghawng nasa a ti reng a, a ngaih pawimawh te uksak a nih loh chuan BSGI te nena thawhhona an neih te tawpsanah a lo vau fo tawh a ni.
Russian grain leh fertilizer te hi international sanction-in a huam loh a ni a, mahse, Russia chuan shipping leh insurance lamah harsatna a tawk nasa em em tho a ti thung.
Guterres kaihhruaia UN hmalakna America-in a ngaihdanah UN official te chu an lawm lo hle tia sawi ni bawkin Guterres chuan Russia indona kalpui a duh lohzia chiang lutukin a sawi zawk a ni an ti bawk a.
Document putru dang February thla laihawla mi-ah chuan Guterres leh a deputy Amina Mohammed tena an titi dunna a awm bawk a. Chutah chuan Guterres chuan EU Commission President, Ursula von der Leyen in Europe chu ralthuam leh hmanrua tam zawk Ukraine indona thleng avanga siamchhuak tura a turna chuan a ti ‘thlabar’ tiin a sawi bawk.
Hei bakah hian African leader summit chungchang pawh sawidunin chutah chuan Amina Mohammed chuan Kenya presdient William Ruto chu ‘midangte ngai pawimawh lo’ tia sawi bawkin a rin loh thu a sawi bawk a.
America chu UN-a ram dang hruaitute spy fo tia hriat larsa a ni a, mahse, tuna chiang tak maia enthlak dan kimchang tihchhuah hi a zahthlakin nghawng na tak leh chhe zawk thlen thei a ni thung.
Heng US document putru te hi social media platform pakhat Discord-ah tihchhuah hmasak ber niin Discord hi gamer tena an hman rim em em niin chumi hnuah channel hrang hrangah thehdarhin a awm zui a. Discord te chuan US sorkarin a chhui chiannaah theihtawpa an puih tur thu a sawi nghal bawk a.
US national security thupuangtu John Kirby chuan US sorkar chuan document putru chu chiang taka a chinchhuaka hriatfiah a tum thu a sawi a. “Thil putru pawi leh hlauhawm thei tak a ni a. Tu nge mawhphurtu kan la hrethei lo va, eng vang nge pawh kan hre thei lo. National security nghawng a neih theih dan tur te kna chhut mek a, tunah chuan criminal investigation kan kalpui mek a ni” tiin a sawi a.
“A bulthuta hriatchian kan tum a, tu nge a ti tu leh mawhphurtu chinchhuah ngei kan tum” tiin US national security thupuangtu John Kirbya sawi bawk a.
Eng tiangin nge heng United States classified document pawimawh te hi a puhruk hriat theih a la ni lo va, February thla laihawl atanga putru tan daih tawh nia ngaih a ni thung.