Emmanuel Macron thusawiin inhnialna siam

French president Emmanuel Macron chuan tun hnaia Taiwan kaihhnawiha sawi a neih te chu a dinpui tlat thu a sawi a, France chu US leh China inbakkaihnaah a inhnamhnawih tur a ni lo a ti a ni.
Tun hnaia China ni thum chama a tlawh hnua interview a neihnaa a sawi niin US ally nihna chu ‘chhiahhlawh’ nihna a ni lo a ti bawk a.
A thusawi te chuan politician leh Atlantic ral lehlam lehlam sawisel a hlawh phah hle a. Mahse, Netherlands a tlawhnaah a thusawi chu a dinpui tlat thu a nemnghet zui a.
“Ally nih vangin chhiahhlawh kan ni tihna a ni lo a, mahni pawh inngaihtuah thei lovin kan awm tihna a ni lo,” tiin Macron chuan Netherlands a press conference a neihnaah a sawi a.
French preasident chuan Taiwan chungchanga France dinhmun ‘status quo’ thlawp chu a danglam eih lo ti bawkin, Paris chuan “One China policy pawmin harsatna awm mek te peaceful resolution a chinfel a thlawp” tiin a sawi bawk.
US president hlui Donald Trump chuan Macron chu China kawmngeih tuma hnaihah a puh a, mahse, French leader chuan Trump thusawi chu chhan let a tum loh thu a sawi thung.
White House erawh chuan sawi dan dang neiin Biden administration chuan ‘France nena inlaichinna tha tak kan neihah kan ngaih a thaa rintawkna kan nei a ni’ a ti ve thung.
Taiwan foreign ministry pawhin US ang deuh chiaha sawiin mahse Macron thusawi erawh an chhinchhiah thu an sawi a. Senor Taiwanese official chuan Macron thusawi chuan ‘a ti hrilhhai’ tiin a sawi thung a.
Liberte, egalite, fraternite (Liberty, equality, fraternity) a hlui ta em ni?” tiin Taiwan parliament speaker Si-kun chuan social media ah France motto “liberty, equality, fraternity” chu hmer telin a ziak lang thung a.
“He thil hi constitution a bilhluh a nih hnuah ngaihthah a pawi lo em ni? Nge ni democratic ram changkang zawk ten ram danga midangte nunna leh thihna an ngaihthah dawn zawk?” a ti bawk.
Analysts te chuan Macron thusawi dan atang chuan Taiwan vanga boruak tang awmah US chu China ang bawka demawm a ni a ti tiin an sawi a, EU pawhin Beijing laka rum zawka chet a lak chuan harsatna a siam zawk dawn tial tial a tihna a ni an ti.
Hetih lai hian China chuan Macron thusawi chu namen lova fak thungin sawiselna a tawk pawh chu mak an tih loh thu an sawi thung a.
“Ram thenkhatte hi chuan ram dangte independent leh mahni intodelh an nih hmuh an duh lo. Chu ai chuan an duh ang zawm tura ram dangte nawr luih an duh zawk” tiin China foreign ministry thupuangtu Wang Wenbin chuan a sawi.
Mahnia ro inrel Taiwan chuan Chinese mainland nena danglamah a inngai a, constitution hran neiin hruaitu turte pawh democratic taka thlan an ni. Mahse, Beijing chuan Taiwan chu a province inla hrang mek eng hunah emaw mainland China nena la inzawm leh tur leh a tul chuan tharum pawh hman hial mai turah a ngai ve thung.
US chuan diplomatic takin China dinna leh one Chinese government a pawm laiin President Joe Biden chuan Taiwan-in beih a tawk a nih chuan US-in chhan tura chet a lak tur thu a sawi thung.
Tunkar tir lam khan Beijing chuan Taiwan President Tsai Ing-wen leh US House Speaker Kevin McCarthy tena inhmuhna an neih duh lovin Taiwan chhehvelah sipai nunchan nasa taka zirna a nei zui a ni.
Hetih lai hian Presdient Tsai chuan a sorkar chuan US leh democracy ram dang te nen China ‘authoritarian zauh zel tumna’ karah thawhhona neiin an kal zel tur thu a sawi thung.