District Jail Lunglei thawmthat tulna nikumah aupui a ni tawh

District Jail Lunglei thawmthat
tulna nikumah aupui a ni tawh
Nikum May thla daih tawh khan Lunglei media ten District Jail Lunglei harsatna tawh leh thawmthat a tul dan hi an lo tlangau pui tawh chungin, sawrkarin a ngaihsak lo tih Congress Thalai chuan an sawi.
LDYCC thuchhuak chuan District Jail Lunglei atanga mi 5 an tlanchhuah avanga Lunglei khawpui leh a chhehvel mipui raltitna chu pawi a tih thu sawiin, Jail harsatna tawh hrang hrang hi nikum May 18 khan Lunglei media-ten a hmunah chhuichiangin an lo tlangau pui tawh a, kum khat dawn hnu ah pawh an harsatna tawh hi sawrkarin sutkian sak a hnekin, thawktute a hma aia indaihloha an dah hi sawrkar hian District Jail Lunglei a ngaihthah zia a ti langchiang hle tih a sawi.
April 20 khan LDYCC chuan Jail hi a hmunah tlawhin thil thlen dan leh chhan an en tih a sawi a. ‘Awlsam taka mi 5 an tlanchhuah theih chhan hi Mizoram sawrkarin District Jail Lunglei a hlamchhiah vang leh a tih tur a tih loh avanga thleng niin kan ngai,’ a ti.
Lunglei Congress Thalai sawi danin, District Jail Lungleiah hian thawktu 23 awm turah 13 chiah awmin, medical duty tur pakhatmah an awm loa, nurse pakhat nei ve in, tunah hian Serchhipah attach a ni a, pharmacist hi kumin January khan a pension a, a aiawh tur hi dah ala ni lo.
Jail hian ambulance pakhat a nei a, lirthei dang a nei lo. Driver pakhatmah pek an nih loh vangin emergency-a lirthei khalh tur pawhin warden atanga pawh chawp thin a ni.
Tang (inmates) awm thei zat mi 100 a nih laiin, tunah hian mipa 134 leh hmeichhia 16, an vaiin 150 an awm a. Tang an tlanchhuah theihna thin hi District Jail thawktute inthlahdah vang niloin, thawktu indaih loh vang leh sawrkarin a tih tur a tih loh vangah an ngai tih a sawi.
‘District Jail Lungleia building hrim hrim hi siamthat leh thawmthat mamawh em em vek an ni a. Staff quarters pawh a tlabal em em a, thawktuten mahni insengin an thawmtha thin a. Duty post 7 awm zingah Mizoram Home Guard duty-te hian post thum hiah an luahlum thei a, heng duty indaih lohna pawh hi remchangah la in, duty awm lohna post zawnah hian tlanchhuah nan an hmang thin. District Jail Lungleia Mizoram Home Guard duty indaih lohna hi Mizoram sawrkar hian a rang thei ang berin dah belh thuai turin kan phut a ni,’ thuchhuah hian a ti.