A chet dan mawi lo avanga sawisel hlawh Ronaldo

Pathianni Saudi Pro League game pakhata 3-2-a Al Shabab an hneh tumin Al Nassr forward Cristiano Ronaldo chet dan mawi lo (obscene gesture) chu television lamin an lo la fuh lehpek a, social media lamah sawisel a tawk zui nghal luai luai!
Portugal forward hian minute 21-ah penalty atangin goal hmahruai khung mah se hun tawp hma minute li chiah awm tawha Brazilian Talisca goal chu Al Nassr hian an chakpui hram a; tawpna hamrik ri hriat tur a awm hnuah social media video lamin Ronaldo khawsak dan an lo la fuh a, tah chuan a kuta a beng a hupkum zauh hnuah a kap bawr zawnah a kut chu a mawi lo zawnga ngaih theihin a tiche a, a chet dan kha Al Shabab supporter-te a diriamna leh elsenna ni ngei tura ngaih a ni.
A chet dan mawi lo avangin an elpui lian Al-Hilal nena an intum tum pawhin Al-Hilal boss chuan an ram atanga thawnhaw tlak a nih thu a lo sawi tawh a, khami tum pawh khan lehlam pawl fans chuan Ronaldo diriamna hmanrua atan Ronaldo elpui kumhlun Messi hming an lam ri chiam tawh a ni!
Chutiang chiah chuan Pathianni zanah pawh Al Shabab supporter-te’n Ronaldo ngei tur ngeiin Messi hming an lam ri leh mup mup a, inkhelh banah chak lawmna leh amah elsentute diriam letna atan Portuguese hian chet a han thawh ve zauh niin a lang a, khelmual chhunga an television camera kamte chuan la fuh chiah lo mah se fans lam camera-ah an lo la fuh a, Saudi pundit thenkhat chuan hrem ngei phu a nih thu an sawi hlawm.
Social media kaltlanga video darh leh sawiselna thawm hi official-a chhanletna hriat tur la awm lo mah se Saudi newspaper Asharq al-Awsat tarlan danin national football federation (SAFF) lamin thil awm dan an chhuichiang dawn a ni awm e.
Prominent Saudi writer leh television host ni bawk Waleed Al Farraj chuan social media platform pakhat X-ah an rama disciplinary committee chuan fiahna lian ber a hmachhawn mek tih tarlangin, sum tam mangkhenga an thlemluh Ronaldo laka thununna an lekkawh ngam dawn leh dawn loh an lo thlir mek tih a sawi a, engkim hian limit a neih vek thu leh eng tiata hmingthang pawh ni se chutiang mite tan pawh ramri awm vek a nih thu a tarlang a, chu chu league lian chinte kal dan vek a nih thu a sawilang tel bawk.
He thu buatsaih lai thleng hian Al Nassr lam chuan an superstar kawl mek khawsak dana ‘comment’ an pek awm hriat leh hmuh tur a la awm lo.
Tarlan tawh angin, kum 39 mi Ronaldo hian a chet dan avanga sawisel a lo hlawh fo tawh a, nikum April thla league game-a Al Hilal laka sihnih faia Al Nassr tlawm tum pawh khan inkhelh banah amah tihthinrim tuma Messi hming lamtu supporter-te diriamna atan a mipa nihna a lo chul thuak thuak tawh!
Tunthla tir lam mai pawh khan mipui zing atanga amah vawmna’na an hman Al Hilal scarf chu chharin a kekawr chhungah a thun a, lachhuak lehin tunnel-a a luh dawnah mipui vawmletna’n a hmang zui a, Riyadh Season Cup final-a sihnih faia an tlawm tumin a ni.
Kum 2022 tawp lama free agent ni chunga Al Nassr zawmtu Ronaldo hian season kal laiah game 20 khelin goal 22 a thun tling tawh a, Saudi league top scorer a ni mek.
A team Al Nassr chu khelh 21-a point 52 hmuhpui chungin table-ah pahnihna a nihpui mek a, game khata khel tlem Al Hilal lakah point liin an hniam.