A chhe lam chauh sawi an awm thin – TJ Lalnuntluanga

A chhe lam chauh sawi an awm thin
– TJ Lalnuntluanga
Ramin hma a sawn chhoh mek laiin, mi thenkhatin hmasawnna nei lo leh ram kal danah mi ti beidawng thei zawnga thu thehdarh leh a chhe lam chauh sawi an awm thin tih minister TJ Lalnuntluanga chuan a sawi.
Tamdil Saituala Tamdil Wetland Interpretation Centre & Herbarium’ a hawnnaah Environment, Forest & Climate Change minister TJ Lalnuntluanga chuan Chanchintha avangin Zoramin nasa takin hma a sawn a. Sawrkar hna thawk tawh zawng zawngte, ram hruaitu ni tawhte inpekna leh thawhrimna avangin Mizoram pawhin nasa takin hma a sawn, tiin, ramin hma a sawn lehzualna turin tih tak takna leh neitu thinlung pua hna thawh a ngai a; sawrkar hnathawk mekte pawh ram hmasawnna’n an hnaah tih tak takna nena thawk chhunzawm zel turin a chah tih a sawi.
Mizoramin hmasawnna a hmuh chhoh mek laiin, mi thenkhatten hmasawnna neilo ang leh ram kal danah mipui tibeidawng thei zawnga thu thehdarh a, a chhe lam chauh sawi an awm thin tih sawiin, “Hei hian thalai, mipui vantlang a tihhnual thin a. A eng zawng leh beiseina nena hmathlir neih a ngai a, ngaihtuahna hman tlan a tul tawh takzet a ni,” a ti.
Zirlaite leh research ti turte tana tangkai tak tur ‘Interpretation Centre & Herbarium’ hawn a ni chu lawmawm a tih thu minister hian a sawi a. Hetiang hawng thei tura thawktute inpekna leh thawhrimna fakawm a tih thu a sawi a ni.
EF&CC minister hian Tuiriala Central Nursery siamthat leh chu a hawng nghal a. He nursery-ah hian thing tiak chi hrang hrang 30 chuang awmin, a vaiin tiak nuai 2 vel tunah an enkawl mek a ni.