A chipui Musetti dah\haa semi-final lut Sinner

A chipui Musetti dahthaa semi-final lut Sinner
Flushing Meadows, New York-a kum khat chhunga Grand Slam tournament hnuhnungber US Open khelh mekah dam an tlem ta hle a, men’s singles draw lamah pawh semi-final lut hriat theih tawhin, Ningani zing men’s Grand Slam quarter-final-a Italian player ve ve inbeih vawi khatnaa dingchang zawk Jannik Sinner chuan a title kawl lai humhim turin hma a sawn zel a, a chipui Italian Lorenzo Musetti hnehin last four a lut fel leh tawh.
Kumin chhunga Australian Open leh Wimbledon la tawh Sinner hi round of 16 lama a hneh tak Alexander Bublik khan a dahsang vet vet kher mai a, ‘artificial intelligence’ player ti hiala sawiin, quarter-final-ah pawh chesual duh lo Sinner hian set hloh loin ranked 10th Musetti lakah 6-1 6-4 6-2 hnehna a sualchhuak leh a, vawiin final luh inchuh pakhat zawkah Alex de Minaur of Australia hnehtu 25th seeded Canadian Felix Auger-Aliassime a hmachhawn leh ang.
Kum 24-a upa Jannik Sinner chuan Arthur Ashe Stadium-a hnehna a chan leh hnuah a tumpui chungchang sawiin, “Kan inhre tha a, ram khat tui liak kan ni a, kan draw-ah hian Italian player kan tam a, he hmuna inkhelh pawh a tinuam hle a ni.
“Davis Cup lamah kan tangho a, a chang chuan kan inthianthatna dahthat hun a awm bawk a, mahse, kan inchibai rualin khelmuala inepna chu a tawp zui leh mai thin,” tiin a chipuite nena inhmachhawn boruak a sawichhuak.
Top seed Sinner hian hard-court Grand Slam tournament bikah match 26 tehreng a chak zawn tling ta a, Canadian player lakah fiahna a hmachhawn zui leh dawn a ni.
World No 1 Sinner kha mipate zinga Open era china season khat chhunga Grand Slam pali semi-final lut kim vek thei naupang ber dawttu niin, kum 22 mi a nih lai kum 2008-a lut kim Rafael Nadal hnung dawltu a ni.
Vawiin semi-final-a a hmachhawn tur Sinner lakah Auger-Aliassime hian head-to-head record nei tha zawkin, vawi li an lo intum tawhah vawi thum a chak.
Defending champion nena final luh inchuh thei turin last eigh match dangah singles leh doubles-a US Open junior title lo la ve ve tawh Felix Auger-Aliassime chuan set khatna hloh zet chungin Australian eighth seed De Minaur lakah 4-6 7-6 (9-7) 7-5 7-6 (7-4) hnehna a chang hram a, kum 2021 hnu lama a vawi khatna atan major semi-final a lut.
De Minaur hian Grand Slam tournament vawi rukah last eight lut bawk mah se he stage hi a la pel thei lo tluang zel!
Tarlan tawh angin, men’s singles semi-final lehlamah Novak Djokovic leh Carlos Alcaraz-te an intum ve bawk dawn a ni.