A CLOSER WALK WITH ORGANIC FARMING – 18

RK Dawla
Mb 9366095658

1. Mihringte hian kan damkhawchhuah theih nân eitur kan mamawh a, kan lo hrisel theih nân eitur thianghlim kan mamawh bawk. Chutih rualin, farming hi business operation chi khat mai a ni lo deuh tih erawh kan hriat a ngai a. Keimahni leh kan environment hi farming operation kan kalpui danah hian a innghat thui êm êm a. Environment tirethei leh keimahni intichhe lo zawnga farming kan kalpui thiam a tul takzet tawh a. Chutiang atân chuan organic farming hi duhthlan tur satliah ni lovin, kawng awmchhun zawk a ni.
2. A nihna takah chuan, product tam hi kan mitthla ngawt thei lo. Foreign market mumal deuh kan ban pha thuai dawn a, hemi atâna kan hmachhuan tur neih that ber pawh organic farming a ni. Chutah chuan mass production ni lovin, Quality production hi a pawimawh zawk. Kan thenawm ramte aia ram rem lo zawk leh hmun kilkhawr zawkah kan awm a, Conventional type hian kal ta tak tak ila, hnamdangte kârah kan tân chêt ngaihna a awm lo. Heti chung chung hian, kan Mizo zia pakhat, hlâwk thuai te, damdawi thawk chak tak kan la bawh viau zel a. Hei hi Pathianin kan ram a duan dan niin a lang lo. Kan thiltihin a sawh khâwk leh tur ngaihtuah miah lova, hma lâk duai duai hi kan environment pawh hian a zo lo tan mêk a ni.
3. Ruah a sûr hlek a, Chite luiah bawlhhlawh chi tinrêng vur khâwn tawlh ang maiin a tawlh dûl dûl a. Kan duh chin kan hman zawh tawh chuan, kan duh loh chin (bawlhhlawh) chu kan ngai pawimawh lo khawp a, kan thehthang vel mai mai a ni tih a chiang! A thlang lawkah Aizawl khaw chawm turin Tlawng tui kan la a! Hetiang vel tho hi kan farming system pawh a ni. Tunah hian thingthlang mimir pawhin chemical fertilizers leh pesticides kan hmelhriat tan a. Heng hmanruate hlauhawm dan leh pawi khawih thui theihzia ai chuan, kan hmanna hmuna a thawh that dan chiah kan thlir a! Kan duh ber thlai kan seng tawh chuan, a hnu-a kan environment leh a eitu mihringte hriselnaah pawi a khawih dan tur kan ngaihven tawh ngai lo! Development works-a step siam hrât hle si hi, farming deal dan turah ‘steps’ kan ngai pawimawh lo hle a, direct thei ang ber kan zawng luih luih a! Hausak thuai, hlawk thuai tumin kan phe suau suau a… Bible-in min hrilh erawh – ‘Hausak phut tum mi chu hrem lohvin a chhuak lovang’ tih a ni. Kan hnam hian pâr thuai tum lova, ngheh kan tum hmasak hun a va nghahhlelhawm êm…
4. Farming system hrim hrim hi, a nawlpui ang chuan kan la hniam lulai khawp mai. Thingtlang kuthnathawk nawlpui chu sawi loh, University chhuak mithiam tak takte pawh hi, farming an luhchilh chiah hi chuan, kan nawi niai zel. Mahni line a nih loh chuan, knowledge va neih teuh kha a har mai thei. Mahsela, kan zuan hmain kan tlâkna tur en hmasak kha mithiam chuan a tihdan tur a nih hmel tlat a ni. Kan thiamna aiin kan sum neihzia (neih dan) a lang fiah hmasa deuh zel, farming-ah pawh hian. Hei hi a chhan chu khawvela huho nun ngaina ber hnam hian, thiamna leh sâwtna tak tak aiin pawnlam mawina leh lansarh kan thlâkhlelhzia a tarlang chiang thin. Sumdawng naràn mai mai pawhin damdawi leh leitha thuhlaa an bum theih, changkan hmel fê fê hi kan tam ania! |henkhat phei chuan, company damdawi siamsa an lo chawhpawlh kual a, chu chu man to takin an zuar a, kan la bawh huam huam a. Damdawi a nih tawh chuan, Certified company hnên atang ngei lei ila a tha mai. Company suak kan sawi tam tehrêng nên, labelled leh certified mumal loh, tawngpawng bawlhlo chawhpawlh kan ngam lutuk hi chu kan tawrh tam hmaa sim vat chi zawk a ni.