RK Dawla
Mb 9366095658
-- Advertisement --
1. Furpui kan thleng dawn ta. Fur laia kan hna pui ber leh hahthlak ber, hnim ‘manage’ lam hrût hlek ila. A hmasa berah chuan hnimte hi leilung kalral a, da zel tur vengtu an ni a. Anni awm lo sela, thlaler kan hmachhawn nghal a ni mai! Kumkhat thlai chinna leh kumhlun thlai chinnaah hnim enkawl dan a inang lo deuh a, hei hi kan hriat hran thiam a tul e. Hahdam duh luat vanga tûr hmanga hnim sawisak hi kan ram awihpangah hian thil hlauhawm takzet a ni a. Mi thenkhat chuan Glyphosate hmangin in leh a vel bâkah leilet bial ko leh terrace kote kah an ching hial a. Hei hi tih loh tawp tur a ni, leimin siamtu, lei tidûptu leh bial ko lei tiriraltu mai a ni.
2. Chuktuah huan zau vak lo nei tân chuan, a rem rema thlai ching mai lo deuhin, zauzawng mumal deuha plot siam a tha. Fur hnim tam laiin thlai bi inkar kha parcel chhia emaw silpaulin dum hmanga khuh thin a tha. Hnimte kha khâp khat chen vel an nih khan silpaulin dum hmanga khuhin, hnim kha a tawih a, a bula thlaiin chu hnim tawih chu a that phah êm êm thin. Emaw hnim tawih hnu-ah thlai tuh/phun khan an hriselin an thang tha duh êm êm. Chuktuah huan zau deuhah hnim kan thlo a nih chuan, huan vangtan zawnga kan hlo thlawhna chap phei thin a tha. Hei hian tuihâwkin lei chunglang a len bo tur tam tak a veng thei. Chubâkah hnim tawih kha a thlang lam lei titha turin a insemrual thla dawn a ni.
3. Thlawhhma neia hlo thlo thinte pawhin, hnim kan thlawhin, lei rît hmelhem tam lo thei ang berin thlawh a tha. Hei hian thlai zung a tichhe nêp a, lei chunglang hâng kalral tur a veng bawk. Fur chhiat laia thlai zung kan hliam hian, a septic a, natna a luh phah thei a ni. Tin, hlo kan thlawh khan, pawt phawng mai lovin, chem/tuthlawhin hnim zung kha zuk cheh chah a, lei kâi tlem thei ang berin hnim kha pawh dawh tur a ni. Tin, hnim kan thlawhna kan chhep a nih pawhin, lo vangtan zawngin a khampheiin, mar rual taka chheh a tha. A hnuai lamah mau hnuh leh thing chawrno kan chhep hmasa a, a chung lamah hlo chi dang, nung mai thei ang chite chhepkhawmin, chawlhkar khat hnu-ah hnim nung duh chin chu chawh-leh khan an thi/rêm chak bawk e. Hei leh chen, pi leh pu atangin hlo kan thlo tawh a, chuvangin hlo thlawh pawh awmze tangkai nei thui zawnga kalpui a hun tawh takzet a ni.
4. Thlai kumhlun hmunah thung hi chuan tlemin a dang ta deuh a. Thlai bul hnai chu mulch leh tihfai regular a pawimawh a. A bakah chuan hmim kha ngaimawh viau loh tur a ni. Tin, hnim no kan sâm chhên hian, leiah bacteria a titam a, thlai kumhlun chuan an ngeih lo zawk. Chu ai chuan, hnim kha zuah chang deuh ila, chu chu sàm emaw mau/thingtuai hmanga nêm-bêk kha a tha. Hetia hnim chang tawh a lo tawih hian thlai kumhlun chuan an ngeih zawk a, a chhan chu hnim chang tawih chuan huan chhungah thlai kumhlun mamawh Fungi tangkai a tihtam zawk vang a ni. Thlai kumhlun chinna rêng rêng chu, a tam berah kumkhat chhungin vawi 2 bâk hnim khawih loh tur a ni. Mihringin hmuh nuam leh remchâng kan tih hi thlaiin an ngeih ber ngawt lo. Kan thlai chinten an chhawr tam theih dan leh chhawr rei theih ber dan tura hnim manage kha a pawimawh tawh, kan tun lai khawvelah chuan. Hnim sàm ngun lutuk vanga leilung furah ruahtuiin direct-a a khawih tam chuan, lei a da hma a, thlai an tlo tak tak thei lo. Hlo tûr hmanga hnim kah phei chu khuarei atana lei tichhetu chimawm a ni a, tih loh hrâm hrâm a tha ber e.