RK Dawla
Mb 9366095658
-- Advertisement --
1. Hmanni lawkah India ram atanga thingpuife thawnchhuahte, pesticide zungzam a tam avangin foreign market-ah a hnawng nasa tih kan hria a. Tun hnai lawkah Punjab buh tui leh lâr, Basmati rice pawh pesticide zungzâm tam lutuk vang bawkin harsatna a thleng leh a. Nimin lawk khan Rajasthan State chhunga an chi-seh ilo (spice), company hrang hrangin an sawngbawl chi hrang 93 an test result-ah insecticide zungzâm a tam viau tih an hmuchhuak bawk a. An Health Minister-in Special campaign nei tura a tih chuan, ei tlâk loh khawpa tûr pâi tam eitur 120qtl zet an man chhuak a. Rajasthan sawrkar chuan FSSAI hnenah action la turin a ngên nghe nghe.
2. Mizoramah pawh hian, a test-na khawl kan la nei lova. Selesih-ah kan nei thuaiin a rinawm a, kan ramin hetiang pesticides zungzâm tam dan enna khawl hi a mamawh tawh viau niin a hriat. Phai atanga kan thlai châwkluhte mai bâkah, kan tualchhung ngeia kan tharte pawh hian ngaih a titha mawh khawp niin a lang. Bazar thlai leitu tam takin, damdawi rim nam lutuk, ei lova an paih leh tâk thu sawi an awm fo mai a. Laboratory-ah test a nih loh chuan, chiang taka thilsawi hleih theih a ni chiah si lova. A bikin khawpui hrang hrang chawmtu, thlai huan siamtute hian pesticide an chelek viau niin a hriat a. Khawl kan neih hunah chuan, heti êma kan hnam hrisel loh chhante pawh hi kan la hmuchhuak mahna le… Ni tina kan eitur hmuhte hian eng ang level chiah nge tûr an lo pâi thin tih kha kan la hre chho turah ngai ila.
3. Engpawhnise, kan ramah hian, kan leilung da zel tur ven nân te, hmun ngai hlawk zawka kan enkawl theih nân leh kan lo hrisel zawk nân Organic farming kan uar a tul chho hle a. Heti lam hi Sawrkar laipui pawhin a vei êm êm a, State sawrkar pawhin dan ang chuan bawhzui ve bawk mah se, kan ram mil tura herrem lamah kan la hnufual hle. Kan ram mila sustainable organic farming model duan kawngah project siama inelna ang chi hi buatsaih tam sela. Chuta idea tha zualah te chuan sawrkarin investment kalpui ngam sela. A nihna takah chuan Chak-ai farm, hlâwkna engmah awm lovah pawh sum khati zat kha kan sêng tho. Kan ram leilung mila chakai buaipui dan chu Central mithiamte ai chuan Sialsûk paho pawhin an thiam zawk daih a nih hi!
4. A thuhrimin a ram leilung leh farmer-te dinhmun zir chiang hmasa lova, Dawhkan atanga farmer-te project siam hnan ringawt hi bâng tawh ila. Thil awmze nei lovah sum leh tha, hun leh rilru kan sêng thlawn nasa tawh e. Tin, Horti/Agri dept-a thawk tur pawh hian, recruitment rules pawh siam danglam deuh hi kan mamawh khawp niin a hriat. Naupan lai atanga kuthna pawh thawk ngai lem lo leh no ve tak, kuthnathawh lama tuina pawh nei hran lêm lo, College/University degree an neih vang ngawta farmer-te kaihruai tura kan inruai thin hi a chhangchhiatthlâk mah mah thin deuh. Farm field experience nei mumal lo na nâ na chu, an suangtuahna leh ruahmanna pawh a chhawrnahawm tak tak thei lo fo niin a lang. Agri and allied sector-a hna thenkhat hi chu, kum 3-5 tal farm experience nei tel ni turin recruitment rules hian duhsak sela. Tichuan, kan zia tlâng deuhin a rinawm. Agri & allied sector hi chu – kan state economy khalh kaltu ber, ram chhung mi tam berin kan buaipui, kan ngaihthah vanga mipui mimir hiselna nghawng khawlo fê thei, kan environment tichhe nasa thei ber pawl – a nih miau avangin a bik deuh taka buaipui a tulin a hun tawh êm êm e.