Saudi Arabian club Al Nassr a zawm hnua goal thun harsat tlat Cristiano Ronaldo chuan karliamta Zirtawpni Saudi Pro League match pakhata mualneitu Al Fateh nen 2-2-a an inhnehtawk tumin goal a khung ve ta nge nge a; a club thar tana a goal hmasa ber hi penalty atanga a chhuihluh niin, hun tawp dawnah a team tlawm tur chhanna goal a thun.
-- Advertisement --
Kum 37 mi Portugal international hian hun pekbelh minute thum-naah penalty a chhuihlut a; thla hmasa daih tawha Al Nassr tana bul tan tawh ni mah se Arab ramah hian goal-ah a chefuh thei tlat lo a, media thenkhatin chhuak leh mai tur ang hiala an chhuah hnuah Ballon d’Or trophy vawinga dawng tawh hian a goal hmasa ber a nghakchhuak ve ta nge nge a ni.
Tarlan tawh thin angin, nikum December thla khan Ronaldo hi kum hnih leh a chanve kawl turin Al Nassr-in an senglut a; hetih chhunga a hlawh tur hi official-a puan ni lo mah se media lam chuan euro mak-taduai 200 (USD 216.54 million) chuang niin an tarlang a; a club thar a zawm hnu rei vak loah captain atan ruat nghal a ni.
League khelh 15-ah Al Nassr hian point 34 neiin table-ah hma an hruai a, match khata khel tam chunga pahnihna luahtu Al Shabab nen point inzat kawlin, Ni-ngani hian Al Wedha an luhchilh leh ang.