By RK Dawla
Mb 9366095658
-- Advertisement --
1. March 20 a ni a. Chawlhkar hmasa lam atangin Mizoram hmun tamzawkah chuan ruahtui kan dawng hlek niin a hriat. Kumhlui December atanga ruahtui dawng ta lo vang vang kan nih vangin, kumdang aiin leilung a khawro nasa a. Tin, Rawnàl tâm hnah leh pâr tla leilungah a tam viau bawk. Mi tam takin ram kâng pawizia kan la man pha chiah lo bawkin a lang. Hêng zawng zawng vàng hian kangmei a hluar hman hle. Ramhnuai kàng tam tak chu ruahtui tla hian a hmet mit khatin a lang.
2. Nimahsela, ruah a tlâk hnu hian, khua a thal chho leh hle dawn a. Ruahtlâk hma aiin kangmei a hlauhawm chho dawn hle a. Kan in leh lo, huan lo ram kâng chauh hi a pawi lova, rampalaileng kâng hi kan ram leh leilung tân pawi chikimin a pawi a ni ber. Bawngchaw phurho tân chauh lo chuan a tangkaina sawi tur a vâng! Tin, tun ruah tla hi tuihna siam khawp tak tak a la ni lova, rùn dâl-ah a tla mai chauh a la ni. Kan ram zîm tê hia tul tâwpah lo chuan i hâl fo lo teh mawlh ang u.
3. Nipui thaw tantir-in a keng thin pakhat chu, leia rannung in-up (dormant) tam tak an rawn tho chhuak hi a ni a. Kan thlai eichhetu leh thlai tâna tangkaite pawh, a huhovin an rawn inlâr tan. Thlai kung leh zâra ngêt siamtu chi hnih – lungphur phengphehlep thenkhat leh Pu Vana-sial lam chite pawh an rawn inlar tan e. Inchhungah light an rawn bâwm tan. Khauchher lam chi thenkhat (rawng hring an ni tlangpui) pawh hmuh tur an awm tan. Heng khau hringte hi thlai tiak chilhchhumtu an ni fo thin. Tunlaiah solar light a chhuak tam tawh a, kan hmunhmaah (electric current lût lo mah se) hêng khau leh lungphur phengphehlep bâkah Pu Vana-sialte hi solar light hmangin a hnawksak zual chu an man theih. Thlahpungtu tur tunlaia rawn tho chhuak himdam taka lo man beh theih hi thil hlu tak a ni. Nakin lawkah chuan, a maka maka tam an rawn inlar dawn si a.
4. Thlai tiak tantir zikno bawm-kir a, virus natna hial pudarh theitu Aphids leh Whiteflies-te pawh tun laiin an rawn inlâr tan. Kan thlai tiak/chawrno hnah hnuai lam kha keu ila, heng rannung puitling 2/1 leh an tui keu mai tur hmuh tur an awm thluah ang. Bur eng (yellow)-ah grease tâtin, kan thlai chinnaah târ thluah ila, aphids/whiteflies hi tam tak an tâng hlum thin. Thlaiin hnahpui an rawn chhuan rual khan, he thang hi kam nghal a tha. Dawnfawh, Mai, Berul, Changkha – cucurbits kan tih maite hi Aphids/whiteflies hian an duh bik bawk thin a. Damdawi hlauhawm pui pui hmang lovin, hmanraw hrisel zawk leh pawi khawih thui lo zawk hmanga rannung hnawksak suat hi a hlu hle. Awlsam puat (tûr hmanga kah hmiah hmiah) ai chuan kawng engkimah a tha zâwk lâwt lak a ni.
5. Tin, compost leh mulch atâna hman nuam êm êm, tha bawk si – buhpawl kha tun ang hunah hian a zawi tawh a, a nem-muk a nuam tawh a. Leilunga a zungchhuah leh a kung inzawmna kha a nghet tawh lova, lâkkhawm nawm hun lai tak a ni bawk. Tlangram leh leilet tam takah, buhpawl, fafu leh buhsi-te, hmang tangkai zui lova kan tawihraltir mai mai hi uihawm tak a ni. Pa (mushroom) khawi nan chauh ni lovin, Ran In-a dah atân a tha êm êm. Ran zun-êk an hipral chakin, a hnâwng chiau lutuk tur an vêng a. A huh chiau dawn tih veleh khan uptawih atân duhthusam a ni chiah bawk. Hahthlâkin buaithlâk deuh hlek pawh nise, kum tam daih kan leilung siamtha paha thlai tâna thiltha tinrêng kengtu, buhpawl, ran-êk, thingzaina nawi etc hi a tam thei ang ber i hmang tangkai teh ang u.