Serie A goal khung thei upa ber Ibrahimovic

Serie A goal khung thei upa ber Ibrahimovic
AC Milan chak loh zanah an veteran forward palian Zlatan Ibrahimovic chuan mimalin mellung pawimawh a phun a, 3-1-a mualneitu Udinese chak zana Milan goal awmchhun a khung hmangin kum 41 mi hi Italian Serie A chanchina goal khung thei upa ber a ni.
Hliamin a tihbuai ve tak fo Swede hian nikum January ni 9 zana sithum faia Venezia an hneh hnu khan AC Milan tan goal a thun leh ta lo vang vang a; Inrinni zanah khelmual lutin, first half hun pekbelhah penalty a pet a, home goalkeeper Marco Silvestri chuan dansak zet mah se pet nawntir a ni a, tah hian goal-ah chantirin Italian top flight-ah record thar a siam zui ta a ni.
Khup hliam serious tak atanga a dam hnuah a vawikhatna’n goal a tilut ngei a, a team tlawm tur erawh a chhan zo ta chuang lo a; he thu buatsaih lai thleng hian khelh 27-a point 48 hum chungin Milan-in Serie A table-ah season thara Champions League khelh phakna hmun hniam ber palina an luah.
Udinese lamin goal thun hmasain, tan atanga minute kuana lekah Roberto Pereyra chuan lei hrul deuh thawa petin goal hmahruai a thawh zet a; chawlhlawk dawnah penalty atangin Ibrahimovic chuan mikhual siphurh a sut zet a, mahse, first half hun pekbelhah vek hian Gomes Betuncal chuan mualneitu team hmahruai nawnna a thun ve leh a, 2-1-a hmahruai chungin Udinese-in chawlhlawk an hmang zui ta tho.
Second half laihawl pelh minute 70-ah Kingsley Ehizibue chuan home team goal thumna leh he match-a goal hnuhnungber ni zui ta a khung ve leh a; Udinese-in pariatna an luah chhoh laiin AC Milan-in palina an thawhsan zo lo.
Season liamtaa a khup a tihnat hma khan Ibrahimovic hian Milan chu Serie A title lakpuiin, nipui thawt laiin a khup hliam zai a ni a, kumin February thlaah inkhel theiin a thochhuak leh chiah a; Inrinni zana Milan captain banhren hreng thei upaber ni tura starting line-up a rawn luah chhoh leh hma thleng khan season kal laiah substitute bench atangin vawithum khelmual a lut a; Sweden squad tharah pawh tunhnai khan koh a ni leh ta bawk.
Inrinni zan inkhelah Ibrahimovic hian goal dang thun theihna hun tha hmu bawk mah se a goal thun endik a nih hnuah video assistant referee chuan Ibra goal tur intintuah chhoh laia Jaka Bijol-a handball a hmuchhuak a, Milan goal hnihna tur hnawlsak a ni.
Tarlan tawh angin, chawlhlawk dawna Ibrahimovic-a penalty pet hmasak zawk dansak a nih hnuah keeper-in a hun hmain line a pel a, petthattir a nih hnuah chesual nawn duh loin record hlu tak a siam zui ta a ni.
Ibrahimovic-a’n kum 41 leh ni 166-a upa ni chunga Serie A goal khungtu upa ber record a siam hma thlenga record kawltu chu kum 41 leh ni 25-a upa ni chunga kum 2007 daih tawha Serie A goal thuntu Alessandro Costacurta kha a ni.
Ibrahimovic-a starting line-up luahkir leh thei hi top four tal nih phak ngei tuma tan khawh mek defending champion tan chanchin lawmawm a tling ngei dawn a; thla thar hian Champions League quarter-final inkhel vawihnihah Serie A hmahruaitu Napoli hmachhawn tur an nih bawk avangin tawnhriat leh huhang ngah Sweden international inkhel leh thei ta hi San Siro club tan thawk huaina tham a tling awm e.
AC Milan hi chak se pahnihna luah chho thei tur an ni a, mahse, an chhuah-vahna atanga point khat pawh an hawn zawh tak loh avangin nizan inkhel result tarlan hman loh pakhatah an aia point khata hniam chunga pangana luahtu AS Roma-in Lazio an hneh chuan Stefano Pioli team hi top four pawn lama an tawlh-chhuah hial a ngai tawh ang.
Milan manager Pioli chuan inkhelh banah a naute khelh dan sawiselin, “Khati mai maia ka team-in an khel a nih chuan inbuatsaihna lamah coach-in a thawk chhe hle tihnate pawh a ni ang a, vawiin tlai hian kan chim chin pangngai kan pha lo hle a ni.
“Tun dinhmunah chuan kan tan Scudetto humhim ngaihna a awm tawh lo a, mahse, Champions League khelh phakna hmun luah erawh kan la beisei thiang a, season kal laiah tun aia khelh that zawk hi kan duh a ni,” a ti.