By RK Dawla
Mb 9366095658
-- Advertisement --
1. Thlai chi hrang hrang chingtu, farmer hrang hrang atangin zawhna tam tak ka dawng thin a. Chûng zinga ka dawn tam ber chu – ENGE PÊK TUR tih hi a ni. Kan han inbe thui deuh a, an rilru-a an tinzawn ber nia lang chu ENG LEI|HA NGE KA LEI ANG tih kha a lo ni thin. Rannung leh hri vanga harsatna an tawhte pawh, eng damdawiin nge kah tur tih kha a ni tlangpui thin. Heng thilte hi thil tul tak niin a lang a; mahsela a aia pawimawh hmasa a awm thin. Chûngte chu invenna leh keimahni ngeiin hnaivaiah, suma lei ngai lova kan hmuh theihte hman tangkai a ni.
2. Kan thlai chin tam ber pawh, suma chang thei tur thlai chi hnih-khat, êk beng nghek kha a ni thin. Thlai chi hrang hrang eitur kan mamawh si a, kan mamawhte chin tel lamah kan harh a tul hle mai. Kan leilung pawh hian thlai chi hrang chinpawlh anlo mamawh viau mai a. In-dîp-dâl lo, in-pei-zawn tlang thei thlai thlan thiam a tul hle mai. A hrangin ser huan, a hrang bawkin thingpui huan, a hrang zelin nimbu huan! thenkhat phei chuan ram hauh nan kan hmang mai mai lekin a lang. Hetiangah hi chuan kan huan leilungte khan nutrient engemaw bik tlakchham an nei thuai a. A tul hunah kan che chat chat thei lova, thlai natna hri a lên pawhin a darh chak êm êm. Ram neih zau hi a tangkai ber lova, kan enkawl theih chin kha hlawk tak leh hmuhnawm taka chûl mâm hi a hlu ber zawk. Tin, knowledge tlêm tê hmanga thar hlawk kan tum chiam thin hi Mizote sim tur langsar tak a ni bawk. Aphids mai mai vanga thlai hmun vui liam ta mai a awm theih viau, pawi tak a ni!
3. Kan thlai chinte hi kan ram tualto, kan leilung leh sik leh sa mil-sa a nih loh chuan, an derthawng bik tih hi hria ila, kan zir a, kan practice a ngai a ni. Kan khawvel lo lum zel leh a ken tel thil tam tak hian, kan rama thlai tualto kan neihte pawh derthawngin a siam mêk tawh lai a, zirchiang hmasa lova thlai chi thar kan buaipui chiam thin hi chu a dik thei lo deuh a ni. Thlai chi thar kan buaipui dawn chuan, natna leh eichhetu rannung a neihte atangin zir hmasa thin ila. Kung khatah engzatnge thar thei, 1 Ha-ah engzatnge thar thei tih hi kan zawhna hmasa leh hriat châk a ni tlat zel mai a, engkim hlutna hi sum leh paia teh vek chi a ni lo tih hrethiam rual chu kan ni tawh mawle.. Kan pi leh pute kha chuan, an tlangram lo neihna leilung (ramchang a nih leh nih loh, a awih dan, changtual lei or phaiphut etc) azirin beisei an nei thiam thin niin a lang a. Vawiina an thlahte, changkang zawk tura ngaihte hi heti lamah hian kan nawi riau ania…
4. Ram hlutna kan tehdan pawh hi a dik hleithei tawh lo. Kawngpui a hnaih poh leh a value a sângin kan hre tlat a. Kha ram kha tui a lâk theih em, a leilung a tha em, a chunglam atanga khuarel leitha hmanga rawn thlithlawr theitu ramngaw a awm thei em tihte kha kan ngai pawimawh lo zawk tlat mai a. Kan thlaite mamawh tinrêng hi kan pe sêng lo. Nature kutah kan innghat thui zawk. Nature-in min thawhpui that theihna lai area kha, potential zawk chu a ni. Chu potential area chu kawngpui or Link road-in a pawh kher hi an ni vek lo. Dai-hnai ram, hmun rem tha, tui lâk awm theih lohna kan hreuh a. Ruahtui khawlna lam ngaihsak lovin thlai hlu dah hlawhtlin kan tum a, kan ropui hlei thei lo fo. Kan khawvel boruak lo danglam zel mila chêt kan thiam a hun takzet tawh a ni. Nature hi kan control thei lova, kan thawhpui thiam zawk a ngai – tlo leh daih rei tur chuan. Kan Mizoram hi a zau lo êm êm a, renchem leh dîm takin i enkawl ang u!