A hmakhua atan lehkha zir zel tum

Footballer a ni a, India ramah a thiam ber ang tih hial theih a ni. Mahse lehkha a la zir a, zir zel pawh a la tum. A hna leh eizawnna atan lehkhazir hi a pawimawh hran lo a, mahse rem vak lo chung pawhin a la zir zel.
“Eng kawng pawh zawh ila, kan hmakhua atan zirna hi a pawimawh a, kan hmakhua atana min chhertu a ni,” a ti.
Lallianzuala Chhangte a ni a, India ram football-ah a changtupate zinga mi a ni. Chumi chu a pass chuan inkhelh a thiam sawt dawn tih a awm lo a, lehkha a zir chuan a hlawh a sang ang tih emaw a pet goal ang tih emaw a awm lo. Chuti chung chuan a la zir a, hah hnepa inkhel chung pawhin zirlaibu a keu thin.
Mumbai City FC player pawimawh Lianzuala hi, May ni 4 khan Kolkata-ah Mohun Bagan nen ISL final an khel a, Mohun Bagan hnehin an champion. Mumbai-a haw leh nghal tur a ni a, fan-te nen an champion hi an lawm ang. Mahse Lianzuala chuan Mizoram a pan a, a tuk leh May ni 6-ah chuan exam hall-ah a thu vang tawh. Chu chu Mizorama a haw chhan a ni.
Lianzuala hi Hrangbana College zirlai a ni a, BA semester hnihna a zir mek. May ni 6-ah hian internal exam an nei a, chumi tur chuan an club awmna lama kir lovin Mizoram a pan a ni.
Football club te hian an fan-te nen champion an lawm thin a, ropui takin an lawm thin. Lianzuala pawh chutah chuan a tel chak a, an player pawimawh leh ngaihsan a nih avangin fan-te pawhin an hmu chak. Mahse chu chu a kalsan a ni.
“Champion lawmnaa tel ve chu, zep lohvah chuan a chakawm ve duh khawp mai. Fans te ka hmu chak a, Pathian zarah fans te pawhin min hmu chak ve a. Mahse exam kha ka ngai pawimawh si a,” a ti.
A thiante leh an hotute pawhin mak an ti a, exam tura Mizorama a haw hi an remtihpui rualin champion lawmnaa a tel lo thei chu mak an ti.
Chutiang boruakah chuan a exam a, zirna lama rilru pek a har thu a zep lo. “Lehkhazir mood-ah ka cheng em em lo, ka ti lui ve,” a ti.
Lianzuala hian professional footballer a nih hmain India ram aiawhin a khel a, chu chu 2015 kha a ni. 2016-ah club-ah lutin professional footballer a ni tak tak ta a, mahse lehkha a zir zawm zel. Covid khan a tibuai a, BA a la pass lo zawk.
Professional footballer ni chunga lehkha han zir hi a hautak a, “A har khawp mai. Hah hnepin training kan han nei a, chuti chunga zir te chu a ngai a,” a ti. “A har a, mahse a tul si a, chau deuh chung pawhin ka zir lui thin,” a ti bawk.
‘Eng nge ka nih tum, eng nge ka eizawnna tih lam a ni lo a, zirnain a tum chu mi hmantlak ni tura mihring chher hi a ni,’ tih hi a thurolum a ni a, “Eng kawng pawh zawh ila, mi hmantlak ni tura min chher hi zirnaina a tum chu a ni,” a ti.
Zirna hi a tangkaipui tih a sawi a, “Hnam dang lehkha zir sang tak takte nena inkawm chang te a awm a, sawi tur kan hriat ve phah a, kan thlahtute chanchin kan lo hre ve ringawt pawh hi a hlu,” a ti. “Zirna hi ka hlawkpui khawp mai. Knowledge a tizau, hriatna a zau sawt a,” a ti bawk. Zir zel a tum a, BA a pass hnuah pawh a theih ang anga zir zel a tum.
Lallianzuala Chhangte hi 2023-ah khan AIFF-in footballer of the year atan an thlang a, ISL lamah 2022-23 khan league player of the season atan an thlang bawk. Senior team-ah India ram aiawhin vawi 35 a khel tawh a, goal sarih a thun tawh.