A lera Bayern kir zanah Mane kir

A lera Bayern kir zanah Mane kir
Sithum faia an mikhual 1. FC Union Berlin hnehin Bayern Munich chuan German Bun-desliga table-ah a sang ber an luahkir a; an lawmna tizual turin nikum November ni 8 hnu lama khelmual lut leh ta ngai lo Sadio Mane chuan a ke hliam thawhsanin team tan ball a pet leh thei ta bawk.
Kingsley Coman-a siam-sak hmangin minute 31-ah Eric Maxim Choupo-Moting chuan Bayern goal hmahruai thunin, chawlhlawk hma minute nga chauh awm tawhah France winger Coman hian a ma pualin home team goal hnihna a khung zui ve leh a; assist vawikhat siamchhuaka goal khat a thun zui hnuah hliam avanga nikum World Cup pawh khel ve thei ta lo Senegal striker Mane chuan Coman thlakin khelmual a lut a, harsatna tawk loin Senegalese hian khelmualah hun a hmang tluan.
Goal hnih hi Munich club-in chawlhlawk hma atan an duhtawk thei mai dawn emaw tih hnu first half hun pekbelh minute khatna a kal mek laiin Coman-a goal tur chhawpsaktu Thomas Muller bawk khan Inrinnia kum 20 tling chho ve chiah Jamal Musiala goal tur siamsak lehin, Bayern top-scorer Musiala goal luh hnu second half-ah goal dang a luhbelh zo lo a, an kawtkaia point thum an ruh leh nen Bayern hian goal difference-a an san zawkna chhawrin Borussia Dortmund an lehpel a, Bundesliga table-ah hma an hruaikir leh.
Khelh 20 ve veah Bayern leh Dortmund hian point 46 ve ve neiin, point 43 nen Union-in pathumna an luah chhunzawm thung.
Inkhel tan hmain Union chuan point-ah Bayern an nihrualpui hman a, nikum November ni 13 hnu lam inelna hrang hranga tlawm la nei lo an nih bawk avangin Borussia Monchengladbach khelmuala 2-3-a tlawm hlimhlawt Munich khelmualah inrintawkna an nei chhe lutuk lo tura ngaih a ni a, mahse, Allianz Arena inkhelah khan hun pumin goal zawnah tum khat lek pawh Union-in ball an thawnlut zo lo!
Nikum nipui thawt laia Liverpool atanga an sengluh Mane khan khelmual a luh hnuah goal thun nghal zo lo mah se assist a siamchhuak teuh hle a, Union penalty area chhunga ball a khalh luh hnuah Muller tan chhawpsakin, German striker goal tur hi mikhual goalkeeper Frederik Ronnow chuan a dansak hlauh a ni.
Bayern Munich hian kartawp Inrinni zanah tla thei dinhmuna ding mek Stuttgart an hmachhawn leh ang a, chumi hnu lawk Champions League round of 16 second leg-ah sikhat faia an hneh tawh Paris St-Germain an mikhual zui leh ang.
Thla thum zet a chawlh hnua khelmual lut leh thei second-half substitute Sadio Mane ‘comeback’ kha Bavarians tana chanchin lawmawm a nih zualna tur chhan pakhat chu March ni 8 Champions League last 16 return leg-a PSG mikhual tur an nih vang hi a nih ngei a rinawm.
Hoffenheim 0-1 Dortmund
Tarlan tawh angin, Inrinni khan Borussia Dortmund chuan 1899 Hoffenheim muala 1-0 hnehna changin Bundesliga table-ah hma an hruai zawk a, chumi chungchang chu thlirlet lawk ila.
Hoffenheim muala an point thum ruh avang khan Dortmund chuan German Bundesliga table-a point inang an neihpui chunga hmahruaitu ni nghet lo tak Bayern Munich lehpelin hma an hruai a, Pathianni zanah Bavarians-in 1. FC Union Berlin an hneh avangin Dortmund hi pahnihnaah an chhuk leh ta rih a ni.
Hoffenheim khelmual first half tawp dawna mikhual chakna goal awmchhun khungtu Julian Brandt khan Bundesliga game a khelh hnuhnung paliah goal a thun fai vek a; Inrinni zana a goal hlu bik tihluh kha Marco Reus-a free-kick hrinchhuah a ni.
Tun kha season kal laia attacking midfielder Brandt-a goal kaw khungna ni tawhin, inelna hrang hrangah belh-khawmin Dortmund kha match kua an chak tluang tling chiah bawk.
Aizawl sipai Lammuala lo inkhel tawh Hoffenheim mualah Dortmund player Marius Wolf chuan mikhual goal hnihna tur second half-ah a tilut ngei a, mahse, VAR endik hnuah hnawlsak a ni.
Wolf hian Brandt-a pass chu goal-ah a chantir zet a, mahse, khelmual sira pitchside monitor a rawn hnuah referee Martin Petersen chuan goal intintuah chhoh laia Ihlas Bebou laka Nico Schlotterbeck-a foul a hmuchhuak a, Wolf-a goal a pawm lo.
Jude Bellingham pawhin second half hun pekbelhah Dortmund hmahruai belhna tur a thun thuak dawn a, mahse, England midfielder shot hi Hoffenheim goalkeeper Oliver Baumann chuan goal kham chungah a bilhchhuahsak hman hlauh.
Calendar kum khat chhunga Borussia-in Bundesliga game an khelh hmasak vawisariha hnehna an chan hnuhnun ber chu league title an lak hnuhnunber kum 2012 daih tawh kha a ni.
Team talbuai Hoffenheim chu a zawna league game nga ngawt an tlawm tlin tak avangin table-ah 16-na an luah thla ta a, relegation play-off hmunah an ding ta!