A lerah Inter insawh nghet deuh deuh

Thawhtanni zan Serie A inkhel awmchhunah 2-1-a San Siro mikhual Genoa hneh lehin Inter Milan chuan league table-a an hmahruaina an phun nghet zel a, ti hian, anmahni hnaihbertu Juventus lakah point 15 zetin an sang fal tawh a ni.
Darkar chanve an khel tling tihah Kristjan Asllani chuan mualneitu team hmahruaina goal khungin, minute 38-ah Nicolo Barella hlawhchhuah penalty atangin Alexis Sanchez chuan sihnih faia Inter hmahruaina goal a chhuihlut ve leh.
Asllani goal hmahruai siamsaktu Sanchez khan season kal laiah a team tan goal thum a thun tling ve ta a ni.
Second half tir lamah Johan Vasquez chuan Genoa siphurh pakhat zawk sut then ve bawk mah se kha bak Inter -in goal dang an chhuah belh duh ta lo a, a zawnin league-ah vawikua an chak tling ta a ni.
Inelna dang nen belhkhawm phei chuan Internazionale kha a zawnin match 12 an chak tling tawh a, title race-a an elpui lian ber Juve tan chuan hmakhalh an khirh khawp tawhin a rinawm!
Seaon kal laia league game 27 an khelh tawhah Inter hi game 23 an chak tling tawh a, nikum September thla kha an tlawm hnuhnunber tum a ni daih tawh.
Nikum December ni 29-a Genoa nen sikhat ve ve thuna an inhnehtawk hnu khan Inter Milan hian point an la hloh leh ta lo bawk!