A lerah lehkhabu ngainate

A lerah lehkhabu ngainate
Naupan lai atangin lehkha a chhiar a, chhiar chak zawngte chu nei ve tho mah se a hmuh ang ang a chhiar thei. Tunah chuan tleirawl a ni tawh a, HSLC-ah pakhatna a ni.
MBSE buatsaih HSLC exam-a pakhatna Cynthia Lalhlupuii Shangpliang hi lehkha chhiar taima a ni a, amah pawhin lehkhabu atchilh a inti. Naupan tet atanga lehkhabu chhiar a ni a, kawng hrang hrangin hei hi a tangkaipui a, zirnaah pawh a tangkaipui.
“Tun tumah pawh literature-ah ka hmu tha a, hei hi lehkhabu ka lo chhiar thin vang a ni,” a ti a, subject dangah pawh a tangkaipui tih sawiin, “Thil zir tak tak tur chuan hriatthiam a ngai a, lehkhabu chhiar hian hriatthiamna min pe a,” a ti.
Ni tin nunah pawh lehkhabu chhiar hi hlawkpui a inti a, “TV ka en pawhin lehkhabu chhiar thatzia hi a lo lang a, ka tangkaipui thin,” a ti a, “Mi biak te pawh kan thiam phah,” a ti a, hmun hla tak atanga rawn kalte nen inbiak ngai se, lehkhabu chhiar thin chuan an biak thiam bik a rin thu a sawi.
Lehkhabu chhiar a tangkaipuina dang leh chu, “English kan man phah,” a ti a, a hriat loh laiin English-ah hma a lo sawn phah tih a sawi.
Cynthia-i hian Bible a ngaina a, a lehkhabu duh ber pawh a ni. A chhiar chhuak tawh a, chhiar chhuah tum kher lovin a duh lai a chhiar thin bawk.
Tunlaia a chhiar chu Sherlock Holmes a ni a, a naupan lai atanga a chhiar thin thawnthu lam hi vawiin thlengin a la ngaina. Mizo pawh English pawh, lehkhabu a hmuh remchan chu tui takin a chhiar thei.
Mipaah Vanlalrinawma a sang ber a, ani pawh hi lehkhabu chhiar thin, naupan lai atanga chhiar thin a ni. Nikum kum tawpah khan MZP buatsaih quiz inelnaah an sikul aiawhin a tel a, pahnihna a ni. Chuta a lawmman dawn pawh chuan lehkhabu a lei a, a sum lakluh hmasak ber atanga sawma pakhat pe, lehkhabu lei a ni.
Mizo lehkhabu leh English lehkhabu a chhiar ve ve a, naupan tet atanga chhiar niin, vawiin thlengin a hunawl hmanna pawimawh a tling. “When Black Birds Fly” tih bu, Hannah Lalhlanpuii ziak hi ngaihnawm a ti a, MAL-in book of the year atana an thlan hlim “Daidanna bang phena thuruk” tih bu chhiar a tum mek.
Cynthia-i leh Rintea te hi social media khawih nasa lo ve ve an ni a, khawih ve zeuh chauh ve ve an ni. An kohhranah Tleirawl Inkhawmah ‘regular’ taka inkhawm thin an ni ve ve bawk.