Zo hnahthlakte tan inrelbawlna hran duh thu sawi

Zo hnahthlakte tan inrelbawlna hran duh thu sawi
Manipur-a Zo hnahthlak MLA te’n inthurualin thuchhuah (press statement) an siam a, Manipur-a Zo hnahthlakte tan inrelbawlna hran neih an duh thu an puang.
Manipur-ah hian Zo hnahthlak MLA 10 an awm a, an zinga pahnih chu minister an ni. An thuchhuahah hian an vaiin hming an ‘sign’ a ni.
Tuna Manipur-a buaina chhuak hi Meitei thiltih, Manipur sorkar ding laiina a thlawp tiin thuchhuahah hian an sawi a, Chin-Kuki-Mizo-Zomi te laka tharum t”hawhna an ti bawk.
“Keini tribal mipuite lakah hetiang khawpa tharum thawhin, sakhaw hmun, in leh bungruate tihchhiat a nih bakah MLA te, minister te, pastor te, police leh civil officer te, mipui nawlpui te, nu leh an fate pawh zuah an ni lo a, hei vang hian kan mite hi Manipur-ah hian kan awm thei tawh lo,” an ti.
“Chuvangin, kan mipuite aiawh tura thlan kan nih angin, kan mite rilru, politics thila an duhthusam, Manipur state atanga inlakhran an duhna hi vawiin hian kan dinna a ni tih kan sawi e,” tiin an chhunzawm.
“Vanduaithlak takin Manipur state-in min hum thei lo a, chuvangin Union of India hnenah Manipur state nena ralmuang taka inthenawm turin India danpui hmangin SEPARATE ADMINISTRATION kan dil a ni,” tiin a tawp an khar a ni.
Hming ziaktute zinga pakhat Paolienlal Haokip, Saikot MLA chuan inrelbawlna hran (separate administration) tih hi sawifiah theih a la ni lo tih a sawi a, mipuite nen an la sawiho dawn tih a sawi.
“State pawh a ni thei a, UT pawh a ni thei a, kan la sawiho ang,” tiin The Aizawl Post a hrilh.