A naupan lai club-ah Ramos kirleh

Kum 18 zet a vei hnuah Sergio Ramos chuan a naupan lai club Sevilla a zawm fel.
Kum hnih liamta chhung Paris St-Germain lama hun hmang Spain defender Ramos hian Real Madrid tan pawh kum 18 chhung teh meuh khel tawhin, free transfer-a Ligue 1 giants a chhuah-san hnuah kum 37 mi ni tawh chungin Sevilla chuan kum khat chhung atan inremna an ziahpui a, La Liga lamah a inlan zui dawn a ni.
League mawngphah luahtu Sevilla-a a kirleh chungchang sawiin Ra-mos chuan, “Ka tan ni danglam bik a ni a, home-a kirleh hi englai pawha hlimawm a ni. He hmuna ka kirleh thei hi ka hlim em em a, a rang thei ang berin engnge ka tih theih lantir ka tum a, chu chu a pawi-mawh lai tak a ni,” a ti.
Ramos hian Spain tan World Cup trophy pakhat bakah European Cham-pionship trophy pahnih hawn tawhin, kum 16 chhung khan ram tan game 180 a khel tling a; club lamah Real Madrid thuam inbel chungin Cham-pions League trophy pali a hlawhchhuak bawk.
Seville khaw daifema seilian tih takah Ramos hian kum sarih mi a nih laiin he khaw club academy zawmin, kum 2005-a Bernabeu club a zawm hma zawng khan Sevilla tan hian inelna hrang hrangah game 50 a khel tling.
Spanish khawpuibera season 16 a khawsak chhung khan Ramos hian game 671 khel tlingin, trophy 22 a lakpui zingah La Liga title panga a tel..
Kum 2021-a a Real contract a zawh hnu khan season hnih atan PSG a zawm a, khatih chhung khan a zawnin league title pahnih a lakpui leh bawk.