A pasal leiba rulh nan a naute pawm lai hralh

A pasal leiba rulh nan a naute pawm lai hralh
Karnataka-a Ramanagara-ah hmeichhe pakhat chuan a pasal leiba rulhsak nana a fa pawm lai, ni 30-a upa chu cheng nuai 1.5 in a hralh a, hriatchhuah a nih hnuah man a ni.
He hmeichhia hi kum 40 mi niin, naute hralh tur hian thurualpui pahnih a nei a, anni pawh hi thuneitute chuan an man tel ve thu an sawi.
Police te chuan naute pawh hi an manna hmun atanga chhanchhuakin, Mandya-a child welfare home-ah an dah thu an sawi bawk.
He hmeichhe pasal hian December 7 khan a fapa piang hlim, ni 30 chauha la upa chu a bo thu sawiin, a nupui chu a rinhlelh thu police te hnenah a sawi a, police te chhuizuinaah he thil hi hriatchhuah zui a ni ta a ni.
Hemi te nupa hian fa panga neiin, nitin leiba an neih belh zel chu an buaina bul a ni a, loan nuai 3 chuang an nei bawk niin an insawi.
Naute pa chuan a hnathawhna atanga a haw in a fasen bo thu chu a hriat thu a sawi a, a nupui a zawh chuan a hriselna lam a that loh avanga a chhungte doctor hnena a dah thua a chhan chauh thu a hrilh nia sawiin, a rin ve mai thu a sawi a. Mahse, a tuk zelah pawh a nupui chuan a chhanna ngai thoa a chhan zel avangin chin hriat loha awm ngawt mai chu a dika a hriat loh thu leh, a nupui chu a rinhlelh zui tak thu police te hmaah a sawi a ni.
Police te hnena naute pain report a thehluh hnu hian naute awmna chu chhui zui nghal niin, naute nu pawh thu zawhfiah nghal a ni a, Bengaluru-a hmeichhe pakhat hnenah cheng nuai 1.5 a a hralh thu a sawichhuak tih police te chuan an sawi.
A hralhna hmun a sawi hnu hian naute nu chu Bengaluru-ah hian kalpui nghal niin, naute hi an chhanchhuak leh nghal a, a thawhpui pahnihte nen an man tak thu police te chuan an sawi bawk a ni.