A theihna apiangah infiammite puiin sawrkarin hma la zel dawn – Chief minister

Mizoram thalaiten football leh infiamna dangah an theihna tipung a, eizawnna tlaka hma an sawnpui theihna turin a theihna apiangah sawrkar chuan hma a la zel dawn tih chief minister Lalduhoma chuan a sawi.
High Powered Committee (HPC) Lunglei chairman, chief minister hian Zirtawpnia Lungleia 15th HPC Cup 2026 hmawr bawkna a hmanpuinaah he thu hi a sawi a. Infiamnaa talent nei naupang zawn chhuah a, India ram aiawh thei khawpa training tha pek chu an thil tum, a taka an kalpui mek a ni tih a sawi a. Infiammite pawh tang a, hlawhtling tlaka bei turin a chah.
Lunglei chu tunhma atanga “thluak tamna hmun” tih thin, ram hruaitu ropui tak tak, thu leh hlaa mi langsar tak tak, thiamna lama mi chhuanawm tak tak, infiamna huangah pawh mi hlawhtling tak tak leh zaithiam tam tak hringchhuaktu a ni tih sawiin, kum 1983-a din tawh Lunglei District Football Association tha tak an neih avangin hman ata vawiin thlengin inkhel thiam an ngah thin tih a sawi a. Hranghlui inkhel thiam tak tak, professional football-a Mizote hmahruaitu, Mizoram mai ni lo, India football chanchina hming dai tawh ngai lo tur player tha tak tak leh tun dinhmuna Indian football-a hming langsarte zik chhuahna hmun a ni tih sawiin, tuna Indian Super League leh I-League a Mizo player 68 vel zinga 13 chu Lunglei tlangval an ni tih a sawi. Football lama Lunglei district-in hma a sawn chhan chu Lunglei DFA leh HPC Cup vang tih theih a ni tih a sawi bawk.
Professional footballer neih belh zel a, district dangte hmaa kal a, an entawn nih tum turin a chah a. Infiamna chu eizawnna emaw sum leh pai lak luhna emaw a ni ngawt loa, taksa leh rilru hriselna, ram leh hnam chawimawina a ni tel tih sawiin, nu leh pate chu ruihhlo laka fate venhimna atan infiamna tuipui turin a chah.
Chief minister chuan, kum 2011 atanga kalpui tan HPC Cup chu professional ni tura player naupang zawkte inpho chhuahna hmun a nih avangin ngaihhlut tlak a ni tih a sawi a. HPC Cup-a che tha player naupang deuhte chu age group-ah Mizoram aiawh tura koh an ni thin, tiin, professional player engemawzat HPC Cup atanga inhlang kai an awm tawh a, chuti taka rah chhuah nei tha a nih avang chuan HPC Cup chu ngaihlu leh a hmawr bawkna hun pawh hmanpui a ni tih a sawi.
Sawrkarna an chan veleh HPC Fund (District Annual Plan) cheng vaibelchhe 5 ni thin chu vbch. 7-a an tihpun a nih bakah HPC Cup budget pawh cheng nuai 6 atangin nuai 8-a an tihsan nghal a ni tih a sawi bawk.
8 15th HPC Cup 2026-ah hian huang hnih – Men’s team leh Under-16 (Boys) team inelna buatsaih niin, May 16 khan khelh tan a ni.
8 Under-16-ah hian YPC Serkawn leh Mualchin FA Blue in final khelin, Mualchin FA Blue an champion a. Men’s-ah Zobawk South LC leh Bazarveng LC in final khelin, Bazarveng LC team hi 1-0-a chakin an champion.
8 Lunglei district-a khaw hrang hrang, football hmanga inelna HPC Cup hi kum 2011 atanga khelh tan a ni a. Hnahthial VC team chu champion hmasa ber niin, vawi 5 champion tawh Electric Veng VC team chu champion ngun ber an ni.
8 Men’s team bakah age group, women leh veteran chu a remchan dana telh thin niin, kumin hian men’s leh under-16 inelna buatsaih a ni. Men’s hi Lunglei, Hnahthial, Lawngtlai leh Siaha district-a local council/ village council inter-village competition a ni a, team 29 (Hnahthial atangin team 3 leh Lawngtlai atangin team 1) telin, player 673 (re-inforce player 126 leh home player 547) an tel.
8 15th HPC Cup Men’s champion team hian trophy leh Rs. 120000 dawngin, runner-up in Rs. 60000 an dawng. Under-16 champion team-in trophy leh Rs. 10000 dawngin, runner-up in Rs. 6000 an dawng.
8 Heng bakah hian team tan fairplay, semifinalist, quarterfinalist leh participation prize sem niin, mimal lawmman – best player, top scorer, best goalkeeper leh player of the match lawmman siam a ni.