A thlawnin nuai 1833 sem… CM Special Package
Bana Kaih scheme hnuaiah sawrkarin a thlawnin cheng nuai 1833.58 a sem tawh tih chu tunhnaia Mizoram State Policy Coordination Committee thutkhawmnaah tarlan a ni a. Hei hi Chief Minister’s Special Package tih niin a vaiin Rs 18,33,58,370 sem chhuah a ni tawh a, a dawngtu mi 2,258 an ni.
Bana Kaih scheme hnuaiah tho hian mi 201 hnenah bank loan cheng nuai 1441.6 chuang hret pekchhuah a ni a, MRB, SBI leh MCAB atanga pekchhuah niin, loan rul thate hi sawrkarin loan interest a peksak ve thung dawn niawm tak a ni. Tu te pawh rawn sawrkar se, loan interest hi chu sawrkar thar apiangin an rulhpui zel tawh mai dawn ni maw…!
Tichuan, Mizoram sawrkar chuan Bana Kaih scheme thawh khatna (Phase-I) atan mi 2,258 hnenah a thlawnin cheng nuai 1833.58 a sem chhuak ta a, chawhrualin mi pakhatin Rs 81,203 dawng zel ang a ni. A thawh hnihna (Phase-II) hi dilna hawn leh mek a ni a, CM Special Package hnuaiah dilna 22,365 a lut leh tawh a; Phase-I ah khan dilna 29,571 a lut a, pek zat hi 7.6% a ni.
Tuna sawrkar mek party hian election campaign lai khan a thlawna pawisa sem an sawi mawi vak lo a, mahse an han sawrkar takah chuan hming mawi tak CM Special Package vuahin cheng vaibelchhe 18 chuang chu a thlawnin an sem chu a ni ve leh ta mai a. Hei hi sawrkar hmasa Congress leh MNF ten NLUP leh SEDP hnuaia pawisa an sem nen a danglamna a tam lutuk lo ang a; CMSP-ah hi chuan ‘policy’ tih aiah ‘package’ an hmang.
Tuna sawrkar hi kum hnih a la pumhlum lo va, a thlawna pawisa sem Phase-I-na zawhfel a ni a, Phase II-na a kal leh mek a, kum tin kalpui a nih chuan term khat chhungin Phase-V kalpui theih a ni dawn tihna a ni. Tuna CMSP dawngtu zat 2,258 hi Phase tina a dawng tur zat anga chhutin, term khat chhung chuan mi 11,290-in an dawng ang a, cheng nuai 9,168 vel emaw senral a ngai dawn tihna a ni awm e. Hei hi ngaihruatna (hypothetical) mai phei zawng a ni a, a aia tam daih emaw, a tlem zawk pawh a ni thei.
Eng pawh ni se, a thlawna sem hi chu eng sawrkar mai pawh hian an tuipui a, chu chu ‘mipui dinhmun nena inphu tawk’ tihna te pawh a ni thei awm e. Mipui lam hi mahni intodelh lo ni ve thim them tawh ila chuan, a thlawna pawisa sem hi kan politician-te hian policy berah an nei lo mahna le!