A tlem zawkin a tam zawk tawrhna thlen

Kum 2024 Krismas leh kum thar 2025 vuakveta halpuah leh halmawi hal khapna thupek uar taka chhuah a ni a, kum dang zawng aiin dan kengkawhtute pawh an inzar pharh thain, YMA lam pawhin nasa takin sawrkar thupek thlawpna an ti lang a, social media leh Cable TV lamah pawh mipui awareness uar taka kalpui a ni bawk a. Chuti chung chuan zaa za chuan sawrkar thupek hi an zawm ta lo. District hrang hrangah pawh dan bawhchhia hi an awm deuh vek. Aizawl bikah chuan mipui zaa 1 velin sawrkar dan an bawhchhia a, zaa 99 velin sawrkar dan an zah a, an zawm a, sawrkar an thlawp niin a lang.
Chumi awmzia chu, mipui tlem zawk fein sawrkar dan bawhchhe lui chungin mipui tawrhna leh harsatna an siam tihna a ni.
Hei hi thil dangah pawh kan nih dan a ni tlangpui. Tunhma atang tawhin, zu rui mi tlemtein khawlaiah hmeichhia leh nunau an ti ral ti a, an ti thlabar a, khawtlang muanna tichhe khawpin an khawsa thei. Chutih laiin, ‘zurui khin te chu…’ kan la ti zui leh a ni awm e. Kawhmawh bawl mi tlemte khan a tam zawk mipui kha an tithlabar thei tlat zel. Kha kha a tam zawk mipuite khan kan hneh lo nge, kan hlau nge, zurui khin kha mawlnaah kan ngai nge, zurui ho kha mipui nawlpui khan kan ngam tlat lo.
Tichuan hun a inthlak zel a, tunah chuan khawlaia kawhmawh bawl tum zurui ten hmun an chang pha tawh lo, mipuiin kan khing zel tawh, a chhan pawh mi tlemte, dan bawhchhe zawk lehnghal thuhnuaia kun kha a atthlak kan ti a, tunah chuan khawlai pawh a ralmuang tawh. Hetiang hun hi kum hnih khat maia thleng a ni bik lo.
Tunhma chuan traffic rule zawm lo mi tlemtein traffic an ti jam thin, horn pawh a ri nasa thei hle. Tunah chuan lirthei khalhtute dan bawhchhiat vanga traffic hi jam a ni ta meuh lo, lirthei tam vang a ni tawh. Silent city tia hriat kan hlawh a, lirthei khalhtute thuawih takin an intlar a, hmun awl lai apianga tlan ching an awm tawh lo; ‘discipline tha’ tiin India ramah kan thang chhuak.
Halpuah leh halmawi khap chungchangah pawh hian, dan bawhchhe chunga a tlem zawk rorelna hi a tam zawk mipuite hian an la bawhbet ve ngeiin a rinawm.