C. Vanlal Ruaia
9862569310
-- Advertisement --
A hnar a fim chuan a mawng lam pawh a fim thin. Kan CM-in CM a nih hmaa a sawi chu tunah hian a la dikin a lang. Dik zel turin beisei ila. A hmaa sawrkar nuam lo zet mai Restricted Tender, Covid hripui hnuai atanga chhuak kan ni bawk a. Kan lungawina te pawh a sang lo bawk nen. Tuna kan CM chu All India Service bang, Lalbahadur Shastri National Academy of Administration, Mussoorie leh Sardar Vallabhai Patel Police Academy, Hyderabad-ah te administration lo zir tawh a ni a. Chu mai a la ni lo, Indian Lok Sabha a ex-MP a ni a. Kimtlangah a palian tha bawk a, Vai ho zah kai ve phak a ni a. Depde taka nun chu a inhmeh lo viau ang. Mipuiin beiseina sang tak an nei a ni. Ministry a kalpui chiah khan “Min luahlan leh tur chuan kan tih ang an tih ve a ngai ang” tia a sawi te phei chu a challenging hle a ni. |awng hnem lutuk lova thawk bawrh bawrh (talk less and work more) turin mipuiin kan beisei. Rambuai hrehawm tak Mizoramin a tuar a. Remna siam leh hnu pawhin kum 38 Mizoramin India-Budget leh vohbik sum Non-Lapseable Central Pool of Resources (NLCPR) te Development of North Eastern Region (DONER) tlan hian kan awm tawh a. Mahse State rethei ber leh intodelh lo ber kan la ni hi a zahthlak deuh. Nikum November hma lam khan Central Minister ten Mizoram hi an rawn tlawh cham chi a. Sihhmui Lei dawh that a nih avangin, kan Airport atanga Aizawl panna kawngah Sairang -Buichalli kawngah an rawn tlanpui thin a. Kawngchhia, tui tling diak nal an rawn pal tlang thin a. Eng tin tak min ngai ang maw. Suma vohbik kan nih lah an hre vek si. A lo hmuaktute tan khan a zahthlak duh thin ngawt ang.
Tuna kan sawrkar thara kan CM hi a chungah mipui beisei a sang a, Indian budget, a chunga kan han sawi North Eastern Region package zawng zawng hrethiamtu a ni a. Kan chief minister-te zingah hian mark sang tak siam theitu a ni. Kan politician tha tak kal ta, Brig T Sailo ang kha a rawn ni thei a ni. A hnar a fim chuan, kan minister viak tha tak tak te pawh hian an thawk tha khawpin a lang rih a ni.
A hma lama kan ministry ah khan khawpui kawng chep tak taka VIP Siren ti ria mipui tlan lai vai ding a, an tlan ang te kha tunah chuan kan hmu ngai ta lo, thil thar lawmawm tak, Great Change a thleng a, a lawmawm hle. An thil tha tih tam tak a awm, sawrkar hnathawk hlawh salary chu thla tirah a lut ta zat zat mai. Ni 15/20 vela lut leh ni khata lut chu inang lo tak a ni. Tun anga a kal chhoh beuh beuh a, hna an thawh that chuan sawiselna chu a rem telh telh dawn a ni. An dik chuan an huaisen ngei dawn a. Diklohna leh hlemhletna zakkep chung chuan tumah a zilh ngam loh a. Sawrkarin thil a tih tak tak chuan bureaucrat te tan thil tih ruk ngam a ni lova. Ministry kal ta lamah khan a lalberin “Sawrkar deptt hotute sum dik lo taka hmang an awm” tih te an sawi kha hrem theitu a ni a, hrem mai awm a ni a. Hrem thei din hmunah a ding lo nge, tih chu public zawhna a ni thin. Hman deuha minister pakhat chuan, “Tun lai thangthar mut nachang hre lo thawh nachang hre lo” a ti a. Tun lai thangtharte chu an hrin a ni a. Ngaihtuahna thuk tak a hmang lo nge; Chakai nufa kal inzirtir a ang. Brig. T Sailo khan, Leilet leh Tuilak a Survey na kawngah “Engineer dulah tiangin a hawlh” an ti a. Sum tam tak kal ral tira lu pan hna thawh a hmuh khan a thin a rim a ni. Dul hawlh tur khan dik hmasak a ngai tlat si a. Dula hawlh tur hi Brig T Sailo a hnuah pawh khan an tam mai thei a; mahse an hawlh ngam tlat lo ni maw. Tuna kan CM lalberin EIRUK a do tlat avangin Eiru chu a hrem ngam ngei turah mipuiin an ngai a. Chu chu mipuite thil thar nghah (Great Change )chu a ni.
EIRUK DO: Kan CM hian EIRUK do chu a chorus a ni a. Rahbi thar Mizoramin a dawn tanna han ni se. A hma lama sum chungchanga India rama Special kan nih kan sawi ta a. |ha taka sum kan hman hi Central India lawmna a ni a. Kan ram tan a tha hlei hlei. Tin, kan zahawmna a ni bawk. Delhi vela sum zuk sawi chhuah rawn puan vak vak ang chi pawh hi ri tawh lo se. Mahni pumpui tanghma ngai lutuk thlarau rethei politician hi lo bo tawh se. Kan ram hian intodelh lam pan ve se. Ram hausak zar zoin Mimir hi Foreign ramah kan thih hmaa zin ve te kan chak hi. Brig T Sailo-an, “UT suma ram develop ringawt pawh hian Mizo mipuite hi foreign-a zin mai thei tur vek kan ni” a ti.
KAWNGPUI HNA HMASAAH :
Kawngpui hi Mipui nawlpuiin kan chhawr tangkai a, development kai rualna ber a ni a, kawng pui pawh khawpui chhung an siam mek a. Khawvel khawlumin climate a tihdanglam nasat em avangin Fur pawh a intan hma mai thei a. Kawng siam nan hian hun bik, thal lai a ngaih avangin sawrkar hian ngaihmawh hmasak (priority) ah nei se. Mizoram mipui hi an va lawm dawn em. Sawrkar hmel tha taka a lanna tur pawh a ni chiang. Ministry hmasa lamah khan Mizoram kawngte India ram state dang aiin a chhe bik lo tiin an insawi mawi thin a, mahse dawt a ni tih kan hmu.
Kawng chungchangah hian kum 2017 vel atanga Luangmual Industry thlang Setlak lui Aizawl Greater Water Supply Scheme, (Sipmiu nge ni)-in Pipe lian a zuk phumnaa kawngpui metal road an laih chhiat hi siam miah lohin a awm char char a. Sakawrtuichhun leh Luangmual Industry te, Central Jail leh Jail veng etc. te chuan kum 5 vel tawp kawngchhia chirhdiak leh nal kawng khu, an tuar a, an khawngaih thlak hle a. Bialtu MLA Adviser to CM nibawk) hian a hriatpui ang chu maw. He kawng pawimawh tak mai hi.. Rangvamual lei tlahniam a chhiat apianga Lengpui Airport panna a ni a. Kawng dang a awm lova. He kawng hi tunah hian metal ve tur a ni mek a. Mahse side drain hi siam tha lova an black top ve ringawt a nih chuan tui tlingin a chim chhe leh vek dawn a ni. He kawng hi leveling dik lo a tam mai a. Kawng chhaka tui dil ringawt, luan chhuahna awm lo a awm nual a, sawrkar hian ngun deuh hlekin han siam se. Tin, Ramrikawn atanga Sakawrtuichhun rama kal Sihhmui bazara chhuak thla Airport panna tur hi a puitlin hun a nghahhlelhawm hle mai bawk a ni.
ZPM Ministry hi a hnar a fim a, tha taka ro an rel a, mipuiin rahbi thar an hmuh a, an lungawi viau mai phei chuan, Mizoram political party zinga pakhat (a hming sawi lo ila) hian chuan a chhiat phah ve ngawt ang.