A vawithumna’n Barca talbuai leh !!

A vawithumna’n Barca talbuai leh !!
Kartawp inkhel danga an elpui lian ber Real Madrid chak laiin Spanish La Liga hmahruaitu Barcelona chuan Pathianni zanah goal awm loin mualneitu Getafe an inhnehtawkpui leh ta a, ti hian, a zawnin an game hnuhnung pali zetah Catalan team hian goal an khung zo lo a, an buaina belhchhah turin an player pawimawh Sergi Roberto chu kaihza tha na avangin first half-ah lakchhuah a ni.
Xavi Hernandez-a team hian first half chhungin goal thun theihna hun remchang inhnaih zetin an nei a, mahse, Raphinha leh Alejandro Balde-te chuan goal ban an tihper a; Brazilian Raphinha hian minute 25-ah Marc-Andre ter Stegen goal-kick umlutin goal ban a petper a, Balde chuan hun remchang ghmu chawpchilh ve nghalin, ani pawh hian goal ban bawk a fuh zui leh.
Karliamta Thawhtanni khan Girona nen goal awm loin an inhnehtawk a, Copa del Rey lama an hmachhawn Real Madrid lakah sili faia tlawm lehin, Pathianni zanah goal an khung zo lo leh a; goal zawn kawngah hmahruaitu Barca hian harsatna tawk chho rih mah se league game kua khelh tur la awmah point 11-in an hnuai chiaha pahnihna luahtu Madrid nen an la inthlau.
Getafe game-ah Raphinha bawkhin second half-ah chance hmu lehin, hun tawp hma minute 15 la awma penalty area kilsir atanga a chhuih chu Getafe keeper David Soria chuan a namsawnsak hman.
Barcelona hian tunkarah Atletico Madrid an mikhual leh dawn a; Pathianni khan Diego Simeone-a team hian 2-1-in an mikhual Almeria an hneh a, a zawna league match vawiruk an chakna ni tawhin, table-ah Pathumna an luah chhunzawm zel a, an chung chiaha awm Real nen point hnih bawkin an inthlau chhunzawm.
Atletico chakna goal hnih hi Antoine Griezmann-a thawh ve ve niin, Champions League qualification race-ah point 12 ngawtin pangana luahtu Real Betis lakah an sang tawh a, top four luah tlang turin dinhmun tha takah an ding chhunzawm zel.
Pathianni inkhel dangah table-a 12-na daih luahtu Sevilla chuan sihnih faiin mualneitu Valencia an hneh a, Europa League quarter-final second leg-a Manchester United an hma-chhawn leh tur atan tha takin warm up match an hlenchhuak.
Loic Bade leh Suso second-half goal hmanga chak Sevilla hian point riatin bottom three lakah an sang a, 18-na luahtu Valencia erawh relegation zone-ah tang chhunzawmin, point thumin himna hmun an chuangkai pha lo.
Cadiz 0-2 Real Madrid
Carlo Ancelotti team chuan Champions League quarter-final second leg-a Chelsea an hma-chhawn leh tur atana inbuat-saihna inkhel ni pahfawmah Inrinni khan away hnehna nuamsa pangngai an chang a, Cadiz an hmachhawn hma La Liga game hnuhnung pathuma vawihnih ngawt tlawm tling Real hian chau angreng taka hma-hruaitu Barca an umna kawngah hnehna pawimawh an chang.
Cadiz muala an goal hmasa zawk hi second half minute 72-a defender Nacho tihluh niin, minute li a kal leh tihah Marco Asensio chuan mikhual goal hnihna a thawh ve leh a; Karim Benzema pawhin goal kham a tihper bawk.
Madrid hian first leg-a sihnih faia an hneh tawh Chelsea kha zanin hian Stamford Bridge-ah an luhkhung dawn a, Champions League semi-final lut tura hmachhawp an la neihah Inrinni zan tualchhung league-a hnehna an sualchhuah khan inrintawkna a siam ngeiin a rinawm.
Bernabeu club tana chan-chin duhawm ni turin karliamta Inrinni zan Premier League lamah head coach lailawk Frank Lampard-a enkawl Chelsea chu an mikhual Brighton lakah 1-2-in an tlawm a, Europe lama inkhel pawimawh hmachhawn zui leh tur an nihna kawngah he rsult hian a pui dawn nge tan a laktir sauh dawn hriat a ni lo!