AIFF player of the year atana thlan thar Lal-lianzuala Chhangte (Zo-hnuai, Lunglei) chuan kar-liamta Inrinni khan chawlh hmang turin an khua Lunglei a lut a, Lunglei District Foot-ball Association (LDFA) huaihawtin Pukpui Cente-nary tawngtaina hmunah Lunglei mipui tam takin lirthei nen an lo hmuak a, function tawi hman zawhah Leitlang Lightning Bullet Club leh Royal Knight kaih-hruainain Lunglei khawpui fanpui a ni.
Lza Chhangte hmuahnaah hian lirtheia hmuaktu leh kawngsir vela amah lo hmuaktu an tam hle a; kawng zawhpui zawhah Zohnuai khawtlang huaihawtin Zohnuai Community Hall-ah footballer puala hun hman leh a ni.
Hemi hnu hian zan lamah LDFA hruai-tute chuan Lianzuala Chhangte hi Tourist Lodge, Zotlangah hun hmanpui lehin, LDFA president PC Lalramnghaka chuan he hun hi kaihruaiin, LDFA adviser Zualtea’n chawimawina leh lawmpuina thuziak a hlan.
Lunglei DC Ramdinliani leh Addl. DC Dony Lalruatsangate pawhin he hun hi an hmanpui a; hun hman zawhah Lza Chhangte puala dinner buatsaih chu kilho a ni.
LDFA thuchhuah chuan Lallianzuala Chhangte chu chawimawi phu a nih thu leh discipline tha tak leh Pathian tih mi a nih thu an tarlang a, India rama football khel thiam bera thlan a ni hi Lunglei chauh bakah Zofate zawng zawng tan a chhuanawm takzet tih thuchhuah chuan a tarlang tel.
Zuala hian kum 2013 khan Mizoram huap football-ah hming chher tanin, Lunglei Football Club chu MPL playoff-ah coach Muankima kaihruaina hnuaiah a champion-pui a, heta tang hian a chanchin sawi tam ngai loin hmalam a pan cho ta zel a ni.
July ni 12, 2023, Nilaini zan dar 8:30 hian Mizoram Football Association pawhin HYVE Aizawl City-ah ‘2022-23 AIFF Footballer of the year’ Lallianzuala Chhangte ‘chawimawina leh lawmpuina’ hun a buatsaih dawn.
Mizo star footballer Lallianzuala Chhangte hi Indian Super League lamah Mumbai FC tana khel lai a ni.
A vengte’n Lianzuala an chawimawi
Get real time updates directly on you device, subscribe now.
Prev Post
Next Post