A ziah leh a chhiar zir chawpin Mizo-ah letter hmu

Pawl 9 a nihin A Aw B atangin, a ziah leh a chhiar a
zir chawp a, tha takin a pass; a kum lehah chuan HSLC-ah Mizo subject-ah letter a hmu daih!
Myanmar atangin Mizoramah mi engemaw zat an raltlan a, an fate’n Mizoramah lehkha an zir hlawm. Myanmar-ah hian kawl tawnga lehkha an zir avangin Mizorama lehkha zirte har tih ber pakhat chu Mizo subject a ni. Myanmar-a Duhlian tawng hmangte tan chuan a har lo deuh pawh a ni ang, Duhlian tawng hmang lo Zo hnahthlak dangte tan chuan hautak tak a ni. Iangtintlemi pawhin har a ti reng a ni.
Iangiangi tiin an ko a, Myanmar-a an khuaa pawl 9 a pass hnuah, 2021-ah khan an chhungin Mizoramah an raltlan. Farkawnah in luahin an khawsa ta a, Iangiangi chuan pawl 9 a zir tha leh.
“Lehkha zir theih loh kha ka hlau lutuk a, a chhan chu lehkha kan zir loh chuan kan future a bright dawn lo lutuk a,” a ti a, Farkawn-ah lehkha an zir zawm thei chu a lawm tak zet tih a sawi.
Sikul an kal dawnin an huphurh tih a sawi a, “Raltlan kan ni sia…” a ti. |awng lamah harsatna an nei tih a sawi bawk.
Kawl tawnga lehkha zir thin, an khuaa Duhlian tawng hmang lo an nih avangin pawl 9-ah A Aw B atangin a tan ta a, “A chhiar ka zir a, a ziah pawh ka zir,” a ti.
Mizo subject chu nuam a ti ta khawp a, Tualte Vanglai te, Khawnglung Run te ngaihnawm a ti hle. PS Chawngthu hla ‘Chhingkhual lenmawi’ tih te, C Lalkhawliana hla ‘Lalpa, kan thinlungah lal ber ang che’ tih te chu a hriat sa, a lo sak ve fo thin a ni a, a tam zawk fe chu a vawi khat hriatna mai ni lovin chhiar zir chunga a zir a ngai.
“Mizo subject hi ka zir nasa. Ngaihnawm ka ti a, nuam ka ti a, mahse a chhiar leh a ziah zir chawp kan nih avangin ka tan zir nasat a ngai,” a ti.
2023-ah MBSE buatsaih HSLC exam result a lo chhuak a, pawl 9 a niha a ziah leh a chhiar zir chawp Iangiangi chuan Mizo subject-ah letter a hmu ta hial. Chu mai a ni lo, distinction-ah a pass a, Mizo chauh a ni lo, chhiarkawp leh science-ah pawh letter a hmu.
A sikul nuam a ti a, an zirtirtute a fak hle. “Naupang min duhsak a, min zirtir uluk,” a ti a, “An fel lutuk,” a ti. Sikul naupangte pawh a fak a, “Min kawmngeih a, raltlan kan nih avangin min en hrang lo,” a ti. Farkawn khua a fak a, “Min en hrang lo a, raltlanah pawh min ngai lo a, keini pawh mahni khuaa awmah kan inngai,” a ti.
Iangiangi hian phone a nei a, mahse Chawlhni-ah chauh a hmang thin. A nuin a kawlsak a, Chawlhni-ah a pe thin. Inrinni-ah pawh a pe ngai lo; “Inrinni-ah chuan insuk te, thil dang tih tur a tam a, min pe ngai lo,” a ti. Chawlhni-ah pawh a inkhawm thin avangin, inkhawm kar lakah chauh phone hi a khawih.
Sikul banah vawk chaw a pe a, eirawng a bawl thin bawk. Zan leh zing hi a lehkha zir hun a ni a, zan lamah hian rei tak tak zir thlen chang a nei.
Govt Thanchhuma High School atanga matric pass Iangiangi hian doctor nih a tum a, “Doctor nih ka tum. A chhan chu, doctor hi mi dang tan an tangkai a, mi dang tana mi tangkai nih ve ka duh,” a ti.